Bu hava limanı Naxçıvanın ölkə, eləcə də dünya ilə sıx bağlılığını qoruyub saxlayan vasitədir. “Şərq qapısı” komandası olaraq Naxçıvan Beynəlxalq Hava Limanının qaynar iş rejiminə malik, yorulmadan çalışan, sərnişinlərin rahatlığı, təhlükəsizliyi üçün böyük səy göstərən əməkdaşlarının bir iş gününə şahid olduq.
...Gözləmə zalında bizi tanış səs qarşılayır: “Diqqət! Qarşılayanların nəzərinə! Azərbaycan Hava Yollarına məxsus 261 saylı reys Naxçıvan Beynəlxalq Hava Limanına eniş edir”. Bir neçə dəqiqə sonra paytaxt Bakıdan gələn muxtar respublika sakinləri, həmçinin qonaqlar hava limanının çıxış qapısına doğru irəliləyirlər.
Bununla paralel olaraq digər minik zalından Bakı şəhərinə yollanmaq üçün öz reyslərini gözləyən sərnişinlər qeydiyyatdan keçirlər. Hava limanının Aviasiya Təhlükəsizlik Xidmətinin əməkdaşları tərəfindən sərnişinlər xüsusi yoxlamadan keçirilir, onlara təyyarədə yük yeri və salona buraxılmayan əşyalar haqqında məlumat verilir, gözləmə zalında təyyarəyə gedən qapılara doğru yol göstərilir. Hava limanı dayanacağının “ağuşuna” aldığı təyyarənin yükü boşaldılır, yeni uçuşa hazır olan sərnişinlərin baqajı yüklənilir, texniki heyət təyyarəni texniki baxışdan keçirir, təmizlik işçiləri təyyarəni təmizləyir, növbəti uçuş üçün təyyarədə səliqə yaradırlar. Təyyarə bələdçiləri, pilotlar uçuş üçün hazırlanır. Budur, təyyarə uçuşa tam hazırdır və biz təyyarədəyik.
“Tanrının yaratdığı göylərin də göyü var”, – deyən hava gəmisi pilotunun icazəsi ilə kabinə daxil oluruq. Bu bizim üçün çox önəmli bir andır. Çünki biz nəhəng gəmini heç bir dayaq olmadan bir neçə kilometr yüksəklikdə pilotlar tərəfindən buradan necə idarə edildiyinə şahid olacağıq. Sual yaranır: “Axı pilotlar bu qədər düymənin nə işə yaradığını necə yadında saxlayırlar? Təyyarə enəndə və qalxanda pilotlar həyəcan keçirirmi?” Təyyarə kapitanı Vasili Kuralex və ikinci pilot Rasif Rüstəmov suallarımızı cavabsız qoymurlar: “Uçuş başlayandan bitənədək hər şeyə cavabdehik. Ona görə də uçuş əsnasında qorxmağa, həyəcanlanmağa şansımız, hətta vaxtımız yoxdur (gülürlər). Çünki bütün ekipaj və sərnişinlərin təhlükəsizliyi bizim nəzarətimiz altındadır. Kabindəki düymələrin sayına gəlincə düymələrin sayı təyyarənin növünə görə dəyişir. Amma ümumi olaraq düymələrin sayı 400-dən artıq olur. Bu düymələrin funksiyalarını asanlıqla yadda saxlayırıq, çünki bu bizim işimizdir və işimizi sevərək edirik”. Bu anda təyyarə bələdçisi xəbərdarlıq edir və minik başlayır. Bütün ekipaja xoş və təhlükəsiz uçuşlar arzu edərək təyyarəni tərk edirik.
Hava limanlarının uğuru yalnız müasir texnologiyalardan, quraşdırılan yüksək səviyyəli infrastrukturlardan asılı deyil: bu uğurun əsas meyarını təşkil edən amillərdən biri də orada çalışan əməkdaşlardır. Naxçıvan Beynəlxalq Hava Limanının əməkdaşları fasiləsiz olaraq sərnişinlərin, eyni zamanda yüklərin təhlükəsiz daşınması üçün çalışırlar. Sərnişinlərin qeydiyyatı, onların yoxlanışı, yüklərin qəbulu və yola salınması, uçuşlar haqqında məlumatlandırma – bütün bu proseslər peşəkar, ən əsası səmimi yanaşma ilə həyata keçirilir. Onların gülərüz davranışı, nəzakəti və peşəkarlığı sərnişinlərin rahat səyahət etmələrinə bilavasitə təsir göstərir. Daha dəqiq ifadə etsək: onlar Naxçıvanın səmaya açılan qapısının qəhrəmanlarıdır.
Naxçıvan Beynəlxalq Hava Limanı yalnız səyahət üçün bir dayanacaq deyil, həm də bölgənin iqtisadi həyatının mühüm tərkib hissəsidir. Yüklərin daşınması, ticarət əlaqələrinin qurulması və turizmin inkişafı məhz bu məkanın fəaliyyəti ilə sıx bağlıdır. Bura, sadəcə, bir hava nəqliyyatı mərkəzi deyil, həm də Naxçıvanın dünyaya açılan qapısıdır. Hər uçuş yeni bir hekayənin başlanğıcı, hər eniş isə Naxçıvanın qəlbinə qayıdış deməkdir.
Aygün RÜSTƏMOVA
