2 aprel – Sevginin və dəstəyin günü

Balaca Oğuzun Naxçıvan sevgisi

Bu gün 2 aprel – Ümumdünya Autizm Maarifləndirmə Günüdür. Gəlin fərqli düşünən, fərqli hiss edən bu uşaqlar üçün birlikdə daha anlayışlı, sevgi dolu bir dünya yaradaq. Çünki hər bir uşaq sevgi ilə böyüdükdə dünya daha da gözəlləşir. Autizmli uşaqlar dünyaya fərqli baxır, amma onların sevgisi, hissləri və arzuları bizimkindən heç də az deyil. Onları anlamaq üçün böyük sözlərə yox, sadəcə, sevgi və səbrə ehtiyac var. Bəzən bir gülümsəmə, bir isti qucaqlaşma onların dünyasını işıqlandıra bilər. Gəlin bu gün və hər gün onları olduğu kimi qəbul edək, dəstək olaq və birlikdə daha rəngarəng, mehriban bir dünya quraq.

Autizmli uşaqlara sevgi və qayğı göstərmək, onların cəmiyyətə inteqrasiya etmələrinə dəstək hər birimizin borcudur. Onlara uyğun təhsil mühiti, dostluq yaratmaq və kiçik qələbələrinə belə sevgi ilə yanaşmaq cəmiyyətimizin daha mərhəmətli və anlayışlı olmasının göstəricisidir. Unutmayaq ki, dünyaya böyük töhfələr vermiş bir çox dahilər –riyaziyyatçılar, rəssamlar, musiqiçilər və alimlər arasında autizm spektrinə daxil olan insanlar olub. Bu gün autizmli uşaqların da cəmiyyətə inteqrasiya olunması üçün hər cür dəstək göstərilir. Axı uşaqlar dövlətin gələcəyi, dayağıdır.

“Şərq qapısı” qəzeti olaraq bu dəfə 13 yaşlı Oğuz Seyidovdan söz açacağıq. Oğuz valideynləri ilə birgə Almaniyada yaşasa da, öyrənirik ki, Naxçıvanı çox sevir və tez-tez bura səfər edir. Biz də Oğuz və valideyni Ramilə Məmmədova ilə görüşüb həmsöhbət olduq. Ramilə xanım deyir ki, Oğuz bu sindromla mübarizədə öz əzm və iradəsi ilə bir çox insana örnəkdir: “Burada, təbii ki, cəmiyyətimizin hərtərəfli dəstəyi önəmlidir. Çalışıram ki, Oğuzun sosial həyatını aktiv keçirəm. Oğuz rəsm çəkməyi və yemək hazırlamağı çox sevir. Bu da onun daxili aləmini zənginləşdirir. Oğuz ətrafındakı bütün insanlara qarşı səmimi və mehribandır. Öz doğmalarına isə xüsusi sevgi bəsləyir. O bu yolda ən böyük dəstəyi isə məndən alır. Almaniyada yaşamağımıza baxmayaraq, Naxçıvana ildə dörd dəfə səfər edirik. Çünki oğlum bu yurda qəlbən bağlıdır. O, Naxçıvan mühitində özünü daha yaxşı hiss edir və buranı çox sevir. Almaniyada doğulub böyüsə də, sərbəst şəkildə öz ana dilimizdə başa düşə bilir”.

Söhbətimizin zamanı müsahibimiz bildirdi ki, planlarımız arasında gələcəkdə Naxçıvanda autizm sindromlu insanların yaşaması üçün Oğuzun adını daşıyan ev tikdirməyi düşünürük. Ramilə Məmmədova onu da qeyd etdi ki, daim Oğuzu cəmiyyətə adaptasiya etməyə çalışır: “Artıq onunla birgə bir neçə Avropa ölkəsini gəzmişik. Bu da ona çox yaxşı təsir edir. Çünki bu sindromda olan uşaqlar sevgi, qayğı ilə bəslənməlidir. Ən çox diqqət etdiyim məqamlardan biri isə onun psixologiyası ilə xüsusi məşğul olan psixoloqla işləyərək sağlamlığının qeydinə qalmaqdır. Bu həm müalicəvi, həm də cəmiyyətdə özlərini formalaşdırmaq baxımından müsbət təsir göstərəcək”.

Qeyd edək ki, ona ən böyük dəstəyi Naxçıvanda yaradılan “Autizmli Uşaqlara Dəstək” İctimai Birliyi həyata keçirir. Burada uşaqlara böyük sevgi və qayğı ilə yanaşılır, onların təlim-tərbiyəsinin, təhsilinin, sağlamlığının, sosial müdafiəsinin yüksək səviyyədə təşkilinə hərtərəfli şərait yaradılır, hüquqlarının qorunması, asudə vaxtlarının səmərəli təşkili diqqət mərkəzində saxlanılır. Bu sindromun olması belə insanlar üçün əngəl deyil, əksinə, onlar dünyamızın əngəlsizləridir. Onlar fərqlilikləri ilə daha da güclüdürlər.

Aygün RÜSTƏM

Bülbül QULİYEVA