NAXÇIVAN :

04 Aprel 2025, Cümə

“Netflix”dən dəvət alan ilk azərbaycanlı bəstəkar

...

Azərbaycan bəstəkarlıq məktəbinin istedadlı nümayəndələrindən biri olan Vüqar Məmmədzadə gənc yaşlarından musiqiyə böyük maraq göstərib. O, klassik musiqi təhsili alaraq bəstəkarlıq sahəsində ixtisaslaşıb. Müxtəlif musiqi janrlarında çalışan Vüqar, xüsusilə simfonik və kinematik musiqilərə üstünlük verir. Onun bəstələdiyi əsərlər dramatik və emosional dərinliyi ilə seçilir.

Gənc yaşlarında xeyli uğura imza atan Vüqar Məmmədzadə mədəniyyət sahəsində göstərdiyi fəallığa görə gənclər üçün Prezident mükafatına layiq görülüb. 2020-ci ildə baş verən 44 günlük Vətən müharibəsi zamanı könüllü olaraq ordu sıralarına qoşulub və Azərbaycanın ərazi bütövlüyü uğrunda mübarizə aparıb. Bu müharibədə Füzulidən Şuşayadək döyüş yolu keçib. Vüqar müharibədə göstərdiyi şücaətə görə “Cəsur döyüşçü”, “Füzulinin azad olunmasına görə”, “Qubadlının azad olunmasına görə”, “Şuşanın azad olunmasına görə”, “Vətən müharibəsi iştirakçısı” medalları ilə təltif edilib.Müharibə onun musiqisinə və yaradıcılığına da təsir edib. Bu gün o, döyüş meydanında yaşadıqlarını bəstələrinə yansıtmağa çalışır.

Vüqar Məmmədzadə “Netflix” platformasından dəvət alan ilk azərbaycanlı bəstəkar kimi tarixə düşüb. O, “Netflix” tərəfindən istehsal olunan Osmanlı imperiyasının tarixini əks etdirən “Rise of Empires:Ottoman”serialının ikinci mövsümü üçün musiqilər bəstələyib. Bu, Azərbaycan musiqisinin beynəlxalq platformada təmsil olunması baxımından mühüm hadisədir.Serialın musiqilərində tarixi atmosferi və hadisələrin dramatizmini əks etdirmək üçün Vüqar Məmmədzadə ənənəvi Şərq motivlərini və simfonik musiqini birləşdirib.

O deyir ki, əvvəlcə, mənim haqqımda belə bir yazı hazırladığınız üçün sizə minnətdarlığımı bildirirəm. Hazırda “Netflix” platformasında işləyirəm. Yeni layihə üzərində çalışırıq. Məqsədim yeni nailiyyətlərə imza atmaqdır. Bu mənə zövq verir. Bu yolda mənə ən çox valideynlərim, xüsusilə də anam dəstək olub. Fürsətdən istifadə edib onlara da minnətdarlığımı bildirirəm.

“Netflix” layihəsindən sonra Vüqar Məmmədzadənin yaradıcılığı daha da genişlənib. O həm yerli, həm də beynəlxalq layihələrdə iştirak edərək Azərbaycan musiqisini dünyada tanıtmağa çalışır. Gənc bəstəkarın məqsədi Azərbaycan musiqisinin zənginliyini dünya auditoriyasına çatdırmaq və kino musiqisi sahəsində daha böyük uğurlara imza atmaqdır.

Bu qələbə münasibətilə biz də gənc bəstəkarı təbrik edir, Azərbaycan musiqisinin təbliğində ona yeni müvəffəqiyyətlər arzulayırıq.                              

Aygün RÜSTƏMOVA

Nəşr edilib : 24.03.2025 20:19