NAXÇIVAN :

04 Aprel 2025, Cümə

Diş implantı: müasir stomatologiyanın ən etibarlı həlli

...

Diş itkisi həm estetik, həm də funksional baxımdan bir çox problemlərə yol aça bilər. Bu problemi aradan qaldırmaq üçün müxtəlif üsullar mövcuddur, lakin son illərdə ən çox üstünlük verilən metodlardan biri diş implantıdır. İmplantlar təbii dişlərə ən yaxın alternativ hesab olunur və uzunmüddətli istifadə imkanı yaradır. Lakin hər bir tibbi prosedur kimi, diş implantlarının da həm müsbət, həm də mənfi tərəfləri var. İmplantların üstünlükləri və mümkün riskləri barədə ətraflı məlumat almaq üçün implantoloq Elməddin Salayevə müraciət etdik.

Elməddin Salayev deyir ki, əgər uzunmüddətli və estetik bir həll axtarırsınızsa, implant yaxşı seçimdir. Diş implantları diş əvəzetmə üsulu olaraq bir çox üstünlüklərə malikdir, lakin bəzi mənfi cəhətləri də var. Uzunömürlülüyü, sümük itkisini azaltması, qonşu dişlərə zərər verməməsi, çeynəmə qabiliyyətini yaxşılaşdırması, təbii görünüş və funksionallığın bərpa olunması diş implantının müsbət tərəfləridir. İmplantlar təbii dişlərə bənzəyir və funksiyası demək olar ki, eynidir. Düzgün baxımla implantlar ömürlük qala bilər. Çənə sümüyünün əriməsinin qarşısını alır, çünki implant sümüyə inteqrasiya olunur. Digər protezlər kimi çıxarılıb-taxılmağa ehtiyac olmur. Körpü protezlərdən fərqli olaraq digər dişlər yonulmur. Sürüşmə və ya boşluq problemi yaratmır.

Elməddin həkim onu da diqqətimizə çatdırır ki, implantın bununla yanaşı, əksgöstərişləri də ola bilər. Sümük toxumaları hələ də inkişaf edən uşaq və yeniyetmələrdə diş implantları yerləşdirmək mümkün deyil. Orqanizmin fərdi meyillərindən asılı olaraq ən erkən implantasiya proseduru 17 və ya 18 yaş arasında həyata keçirilir. Çox vaxt xəstənin yaşının 25-dən yuxarı olması tövsiyə edilir.

Qeyri-sabit diabet – diabet xəstələri vəziyyətində, əməliyyatdan sonrakı infeksiyalar və implantın sümük toxumaları ilə inteqrasiyası ilə bağlı problemlər riski artır. Diş həkimi və digər mütəxəssislərlə məsləhətləşdikdən sonra implantasiyanın mümkün olduğu ortaya çıxa bilər. Ancaq burada əsas amil şəkər səviyyəsini sabitləşdirməkdir.Bundan başqa, bruksizmdeyə bir problem var ki, bu üst və alt dişlərin tez-tez qeyri-iradi şəkildə sürtülməsindən ibarət olan diş ətini zədələyir. Bruksizmin mənfi təsirləri diş implantları vəziyyətində də özünü göstərəcək, çünki onlar qəbul olunmaya bilər.

Elməddin Salayev implantın əkstəsirlərinə hamiləlik dönəmini misal göstərərək deyir ki, bu da açıq şəkildə müvəqqəti əksgöstərişdir. Körpə doğulduqdan sonra itirilmiş dişin yerində implantasiyanı planlaşdırmağa başlaya bilərsiniz.

Həkimin verdiyi məlumatlar sayəsində implantların gətirdiyi imkanlar və baş verə biləcək çətinliklər haqqında daha aydın təsəvvür əldə etmək mümkündür. Ona görə də hər bir fərdin tibbi vəziyyətinə uyğun ən doğru qərarı verməsi üçün diş həkimi ilə məsləhətləşməsi vacibdir.

Aygün  RÜSTƏMOVA

Nəşr edilib : 26.03.2025 14:00