Naxçıvan Dövlət Universitetinin nəzdində fəaliyyət göstərən İngilis dili Təmayüllü Gimnaziyanın şagirdi VII Respublika Robot Olimpiadasında Robosports kateqoriyasında I yerin qalibi olub. Biz də “Şərq qapısı” qəzeti olaraq ölkəmizi Dünya Robot Olimpiadasında təmsil edəcək Hüseyn Tahirovla həmsöhbət olub təəssüratlarını öyrəndik: “Robotexnika sahəsinə olan marağım uşaq vaxtlarından başlayıb. Texnologiyaların və mexanizmlərin necə işlədiyini anlamaq istərdim. Məktəbdə keçirilən robototexnika dərsləri mənim bu sahəyə olan sevgimi daha da artırdı və özümü müxtəlif layihələrdə sınamağa başladım. İlk dəfə kiçik robotik layihələr hazırlayarkən onların proqramlaşdırılması və hərəkətə gətirilməsi mənə böyük motivasiya verdi. Yarışlara qatıldıqca bu sahədə özümü daha da inkişaf etdirdim. Keçən il VI Respublika Robot Olimpiadasında 1-ci yerə layiq görülməyim mənim üçün çox böyük nailiyyət oldu və bu, gələcək yarışlarda daha çox irəliləmək üçün mənə motivasiya verdi. Həmçinin “STEAM Azərbaycan 2022” yarışında nominasiya üzrə 2-ci yeri tutmaq mənə öz bacarıqlarımı daha da təkmilləşdirmək üçün stimul oldu. Bundan əlavə, “STEAM Naxçıvan” layihəsi çərçivəsində keçirilən yarışlarda 6 dəfə qalib olmaq mənim təcrübəmi və özünəinamımı daha da artırdı. Bu təcrübələr bu gün VII Respublika Robot Olimpiadasında qazandığım uğurun əsasını qoydu”.
Hüseyn deyir ki, bu yarışa qatılmaq qərarı daha əvvəlki müsabiqələrdə qazandığı təcrübədən irəli gəlib. VII Respublika Robot Olimpiadası onun üçün həm özünü daha yüksək səviyyədə sınamaq, həm də texnologiya sahəsində yeni biliklər qazanmaq üçün bir fürsət idi. Mentor Hüseyn İmanovla birlikdə bu yarışa ciddi hazırlaşıblar.
Hüseynin yarış haqqında ümumi təəssüratları çox müsbətdir: “VII Respublika Robot Olimpiadası mənim üçün yalnız bir yarış deyil, həm də yeni biliklər və təcrübələr qazanmaq imkanı oldu. İştirak edən komandaların müxtəlifliyi və təqdim etdikləri innovativ layihələr mənə ilham verdi. Hər kəsin robotlarının işləmə prinsiplərini, yaradıcı yanaşmalarını və layihə ideyalarını görmək çox maraqlı idi”.
Hüseyn İzmir şəhərində noyabr ayında Azərbaycanı təmsil edəcəyi üçün çox həyəcanlıdır. Ancaq Naxçıvanın adını 1-ci yerə daşımaq onun üçün böyük bir qürurdur. O, İzmir yarışında iştirak edərək daha çox təcrübə qazanacağına və Azərbaycanı ən yaxşı şəkildə təmsil edəcəyinə inanır.
Onun dediklərindən: “Ailəm, Naxçıvan Dövlət Universiteti və universitetin nəzdindəki gimnaziyanın rəhbərlikləri də mənim üçün böyük dəstək olub. Onlar bütün texniki çatışmazlıqlarımı aradan qaldıraraq mənə uğurlu nəticələr qazanmağa kömək etdilər. Bu mühitdə böyümək və inkişaf etmək, uğurlarıma təkan verdi”.
Biz də Türkiyənin İzmir şəhərində keçiriləcək Dünya Robot Olimpiadasında Robosports kateqoriyası üzrə ölkəmizi təmsil edəcək Hüseyn Tahirova uğurlar arzulayırıq. Qeyd edək ki, bu beynəlxalq yarış dünyanın müxtəlif ölkələrindən ən yaxşı robotexnika mühəndislərinin və texnologiya həvəskarlarının bir araya gəldiyi möhtəşəm bir tədbirdir.
