NAXÇIVAN :

05 Iyun 2025, Cümə axşamı

İstanbul-Naxçıvan yeni üfüqlərə açılan qapı

...

Naxçıvan Beynəlxalq Hava Limanı bölgənin iqtisadi həyatının mühüm tərkib hissəsidir. Naxçıvanın coğrafi mövqe cəhətdən blokada şəraitində olması hava əlaqələrinin əhəmiyyətini daha da artırır. Bu məkan, sadəcə, bir hava nəqliyyatı mərkəzi deyil, həm də Naxçıvanın dünyaya açılan qapısıdır. Hər uçuş yeni bir hekayənin başlanğıcı, hər eniş isə Naxçıvanın qəlbinə qayıdış deməkdir. Və bu gün qardaş ölkənin mavi səmasından süzülərək Naxçıvana yol alan təyyarə yeni üfüqlərin başlanğıcı oldu.

“Qoca Şərqin qapısı” adlandırılan Naxçıvan ilə dünya mədəniyyət tarixində mühüm yeri olan İstanbul arasında yaradılan birbaşa hava əlaqəsi təkcə iki şəhəri deyil, iki qardaş xalqı da birləşdirən möhkəm körpüyə çevriləcək. Bu hava reysi Naxçıvanın, sadəcə, coğrafi deyil, eyni zamanda siyasi, iqtisadi və mədəni baxımdan daha geniş imkanlara çıxışını təmin edəcək.

Bu gün “AJet” aviaşirkəti tərəfindən həyata keçirilən İstanbul-Naxçıvan reysi də Azərbaycan aviasiyasının qardaş ölkə ilə yaratdığı sağlam münasibətlər baxımından gələcəkdəki böyük uğurların təməli oldu. İstanbul-Naxçıvan reysi təkcə nəqliyyat xidməti deyil, həm də strateji əməkdaşlığın, dostluğun və qarşılıqlı dəstəyin bariz nümunəsidir. Türkiyə və Azərbaycanın hava nəqliyyatı sahəsində əməkdaşlığının nəticəsi olan bu reys gələcəkdə daha genişmiqyaslı layihələrin əsasını qoyur. Regionun hava nəqliyyatı infrastrukturu bu cür təşəbbüslərlə inkişaf etdikcə beynəlxalq uçuşların sayı da artacaq, bu isə Naxçıvanın turizm və iqtisadi potensialının üzə çıxarılması üçün geniş imkanlar yaradacaq. Bu hadisə həm Azərbaycan, həm də qardaş Türkiyə üçün önəmli bir addımdır.  Bu uçuş yalnız nəqliyyat deyil, eyni zamanda strateji və siyasi əməkdaşlığın da bariz nümunəsidir. İstanbul reysi Naxçıvan sakinlərinə təkcə Türkiyə ilə deyil, eyni zamanda İstanbul vasitəsilə dünyanın müxtəlif ölkələrinə rahat çıxış imkanı yaradır. “AJet”in bu yeni marşrutu Azərbaycan və Türkiyə arasında bir növ “hava körpüsü” rolunu oynayacaq. Bu təşəbbüs təkcə turizm və işgüzar səfərlər üçün deyil, həm də mədəni və iqtisadi əlaqələrin inkişafı baxımından da vacibdir. Eyni zamanda bu reys iki qardaş xalqı birləşdirən səmavi bir bağ kimi dəyərləndirilə bilər. Bütün bunlar göstərir ki, regionun hava nəqliyyatı infrastrukturu gələcəkdə daha çox beynəlxalq uçuşların həyata keçirilməsinə şərait yaradacaq. Beləliklə, bu mənzərə fonunda İstanbul-Naxçıvan reysi təkcə bir marşrut deyil, həm də ümidin, əməkdaşlığın və gələcəyə inamın simvoludur. Səmada çəkilən bu xətt Naxçıvanın yeni üfüqlərə açılan qapısıdır.

Bülbül QULİYEVA

Nəşr edilib : 03.06.2025 18:02