NAXÇIVAN :

02 Iyun 2025, Bazar ertəsi

Sağlam gənclik, sağlam gələcək

...

Bu gün cəmiyyətimizin əsas dayaqlarından biri gənclərdir. Onların düzgün istiqamətləndirilməsi gələcək uğurlarına da zəmin yaradır. İdmanla məşğul olmaq, könüllü fəaliyyətlərdə iştirak etmək və sosial layihələrə qoşulmaq gənclərin həm fiziki, həm də psixoloji baxımdan inkişafına müsbət təsirini göstərir. Bu gün Naxçıvanda bir neçə gəncin təşəbbüsü ilə yaradılan voleybol komandasının əsas məqsədi fiziki aktivliyi həyatın bir hissəsinə çevirməkdir. Biz də həmin gənclərlə görüşüb həmsöhbət olduq. Komandanın rəhbəri Milad Nəcəfov deyir ki, bu gün passiv həyat tərzi sürən bir çox gənc belə təşəbbüslər sayəsində öz gücünü kəşf edir, yeni dostluqlar quraraq sosiallaşır. Naxçıvanda gənclərin işdən sonrakı vaxtınısəmərəli keçirməsi üçün belə kollektivlər çox azdır. Və mən də qərara gəldim ki, gəncləri ətrafımatoplayaraq öz sosial qrupumuzu təşkil edək. Qrupumuzda hər statusdan insanlar, yəni istər tələbə, istərsə də hansısa qurumda çalışan bir çox üzvümüz var. Biz müəyyən vaxtlarda toplaşaraq voleybol, stolüstü tennis kimi idman oyunları oynayır, oxumağı sevən gənclər üçün kitab mütaliələri, əylənmək üçün pikniklər, Naxçıvanımızın səfalı yerlərini gəzmək üçün turlar kimi bir çox sosial aktivlik təşkil edirik.

Müsahibimiz deyir ki, xüsusilə voleybol kimi idman növü gənclərin fiziki sağlamlığının qorunmasında və inkişaf etdirməsində böyük əhəmiyyətə malikdir. Sosial oyunlar və tədbirlər gənclərin gündəlik stressdən uzaqlaşmasına və əyləncəli vaxt keçirməsinə şərait yaradır. Eyni zamanda qrup fəaliyyətləri gənclərin liderlik bacarıqlarının inkişafına və komanda daxilində effektiv işləməsinə kömək edir.

Milad onu da diqqətimizə çatdırdı ki, belə təşəbbüslər gənclərin sosial, fiziki və emosional inkişafına müsbət təsir göstərir. O, naxçıvanlı gənclərə tövsiyyələrini də bildirdi:  Onlar boş vaxtlarını dəyərli keçirmək, telefon və sosial media əvəzinə real fəaliyyətlərdə iştirak etmək, həm yaddaqalan, həm də faydalı işlər görmək üçün qrupa qoşula bilərlər. Belə layihələrin davamlılığı və geniş kütlələri əhatə etməsi üçün hər bir gənc əlindən gələni əsirgəməməlidir. Bizə qoşulmaq istəyən gənclər isə  həftənin bazar günləri Naxçıvan şəhərindəki İlham Əliyev adına Olimpiya-İdman Kompleksində oyunlarda iştirak edə bilərlər.

Komanda üzvlərindən Züleyxa Rüstəmli də söhbətimizə qoşulur. O deyir ki, ona bu komandanın üzvü olmaq mənə çox şey öyrətdi. Ətrafım daha da genişləndi, özümə yeni dostlar tapdım. Dərsdən sonra voleybol oynamaq sağlam həyat tərzidir. Oyun zamanı vaxtın necə keçdiyinin fərqində olmuruq.

Nəticə etibarilə, gənclərin aktiv həyat tərzi yalnız onların şəxsi inkişafı üçün deyil, bütövlükdə, cəmiyyətin gələcəyi üçün də olduqca vacibdir. Sağlam, enerjili gənclik isə güclü və firavan bir dövlətin əsas təməlidir.

Bülbül QULİYEVA

Nəşr edilib : 26.05.2025 15:31