Prezident İlham Əliyev: "Gənc kadrların hazırlanması prosesi bizim gələcəyimizi şərtləndirən amildir. Hər bir  sahədə, o cümlədən hərbi sahədə gənc peşəkar kadrlara ehtiyac vardır".

Sürətlə dəyişən zaman, günbəgün müasirləşən texnologiyalar, tətbiq olunan yeniliklər cəmiyyət həyatının bütün sahələrinin bu inkişafla ayaqlaşmasını zəruri edir. Xüsusilə təhsil dövlətin prioritet sahələrindən olduğu üçün qabaqcıl təcrübələrdən bəhrələnmək vacib amil kimi önə çıxır. Bəzən tarixi gedişat əsasında qazanılan təcrübə də zəruri islahatların qısa zamanda aparılmasını şərtləndirir. 

    70-ci illərdən başlanan milli ordu quruculuğu

Ölkədə hərbi təhsil sisteminin əsası Ulu Öndər  Heydər Əliyevin təşəbbüsü və səyi ilə 70-ci illərdə qoyulub. Azərbaycanın gələcəyinə hesablanmış bu mühüm addım illər sonra I Qarabağ müharibəsində özünü göstərdi. Müstəqilliyinə yenicə qovuşmuş ölkədə aparılan ordu quruculuğunun kadr potensialının əsasını həmin dövrdə təhsil almış zabitlər təşkil etdi. Peşəkar ordu quruculuğu ağır proses olduğundan zamanı qabaqlayan tarixi qərarlar qəbul edildi, hərbi təhsil sisteminə növbəti baxış, dəyişikliklər, bu istiqamətdə görülən mühüm işlər həm də yeniliklərlə müşayiət olundu. Belə ki, Naxçıvan tarixində ilk olaraq hərbi təhsil ocağı yaradıldı. 1998-ci ildən fəaliyyətə başlayan lisey ətrafına yüzlərlə gənci yığa bildi. Hansı ki o gənclər Vətən müharibəsində, antiterror tədbirlərində öz bilik və bacarıqlarını şücaətləri ilə ortaya qoydular. Torpaqlarımız işğaldan azad olundu, ərazi bütövlüyümüz təmin edildi. 

  Zamanın tələbi:  xüsusi təyinatlı təhsil müəssisələri

Ərazi bütövlüyü bizim konstitusion hüququmuzdur və bu hüququn qazanılmasına töhfə verən zəfərimiz, ölkə başçısının qətiyyəti, qəbul etdiyi mühüm qərarlar hərbi təhsil sisteminə yenidən baxışı şərtləndirmişdir. “Gənclərin hərbi sahədə təhsil almasının təşviq edilməsi ilə bağlı tədbirlər haqqında” Azərbaycan Respublikası Prezidentinin 2023-cü il 14 dekabr tarixli Fərmanına əsasən Milli Müdafiə Universitetinin tabeliyində Bakı, Gəncə və Naxçıvan şəhərlərində hərbi kolleclər yaradılmışdır. 

    Naxçıvanda ikinci hərbi təhsil ocağı

Milli Müdafiə Universitetinin tabeliyində fəaliyyət göstərən Naxçıvan Hərbi Kollecindəyik. “Xudayar təsnifi”nin sədaları altında tədris korpusuna daxil oluruq. Bizi bölmə rəisi, mayor Elvin Qurbani qarşılayır. Öyrənirik ki, kollecdə böyük tənəffüslərdə vətənpərvərlik mahnıları səsləndirilir. Çox gözəl! Zamanın dəyişdirə bilmədiyi tək qüvvə də məhz belə vətənpərvərlik duyğuları olub. Bu duyğular müqəddəs hissə çevrilərək yüzlərlə gəncin həyat yoluna işıq salıb. Hərb peşəsinə könül veriblər, Vətən sevgisini bütün hisslərdən uca tutublar və nəhayət, bu yolda şəhidlik zirvəsinə ucalaraq qürur yerimizə, örnək göstərə biləcəyimiz qəhrəmanlara çevriliblər. 
44 günlük Vətən müharibəsi bizə həm də çox yaxşı nümunələr sərgilədi. Ən əsası da xalq-ordu birliyinin bariz təcəssümünü dünyaya göstərə bildik. Həmsöhbətimiz, bizi kolleclə tanış edən mayor Elvin Qurbani deyir ki, ilbəil, xüsusən də Vətən müharibəsindən sonra gənc­lərin hərb peşəsinə marağı ikiqat artıb. Valideynlər də onların bu peşəyə sevgisini dəstəkləyir. 
2024-2025-ci tədris ilindən fəaliyyətə başlayan Naxçıvan Hərbi Kolleci müxtəlif ixtisaslar üzrə orta ixtisas təhsili və əlavə təhsil pro­qramlarını həyata keçirən xüsusi təyinatlı təhsil müəssisəsidir. Kollecə qəbul “Hərbi vəzifə və hərbi xidmət haqqında” və “Təhsil haqqında” Azərbaycan Respublikasının qanunlarına uyğun həyata keçirilir. 
Kollecə tam orta təhsili olan şəxslər, zabit hərbi rütbəsi olmayan hərbi qulluqçular və hərbi vəzifəlilər qəbul edilirlər. İki il müddətində əyani formada təhsil alan kursantlar ödənişsiz yataqxana və gündə 3 dəfə yeməklə təmin olunurlar. Həmçinin onlar üçün müəyyən məbləğdə birdəfəlik və təhsil müddətində aylıq ödəmələr təsis edilib. Məqsəd Azərbaycan Ordusunun peşəkar kadrlarla təminatını gücləndirmək, subbakalavr peşə-ixtisas dərəcəli mütəxəssislər hazırlamaq və əlavə təhsil üzrə kadr hazırlığını həyata keçirməkdir. 
4 hektar ərazidə yerləşən təhsil kampusu 7 binadan və yardımçı qurğulardan ibarətdir. Ən son avadanlıqlarla komplektləşdirilən kollecdə informasiya texnologiyalarının, xarici dillərin tədrisinə xüsusi önəm verilir. Zəngin kitabxana fondu, idman zalı, futbol meydançası, idman qurğuları, mədəni-kütləvi tədbirlərin keçirilməsi üçün klub-konfrans zalı, yataqxana, sosial-xidmət mərkəzi kursantların fiziki, mənəvi-psixoloji hazırlıqlarının, həmçinin istirahətinin təşkilinə imkanlar açır. İkiillik təhsil müddətini başa vuran kursantlar gizir kimi Azərbaycan Ordusunun hərbi hissə və bölmələrində xidmətə başlayacaqlar. 
“Vətən müharibəsi onu göstərdi ki, kiçik komandir heyəti tərəfindən döyüşlərdə bölmələrin idarə edilməsi daha məqsədəuyğundur. Odur ki, peşəkar, təhsilli, mənəvi-psixoloji və fiziki cəhətdən hazırlıqlı kadrların yetişməsi günün tələbidir. Hərbi kollecin yaradılması bu baxımdan böyük əhəmiyyət daşıyır və yetişdirdiyi məzunlar, təbii ki, gələcəkdə fəaliyyətləri ilə öz töhfələrini verəcəklər”, – deyə kollecin zabiti, mayor Kənan Şirinov söhbətə qoşulur. Qeyd edək ki, Kənan Şirinov Xocavənd, Daşaltı, Şuşa istiqamətlərində gedən döyüşlərdə iştirak edib. “Döyüşdə fərqlənməyə görə”, “Şuşanın azad olunmasına görə” medalları ilə təltif olunub. Bildirir ki, Azərbaycançılıq ideyalarına, geniş dünyagörüşə malik, müasir təfəkkürlü, silah və hərbi texnikanı mükəmməl bilən orta ixtisas təhsilli mütəxəssislərin hazırlanması bizim əsas məqsədimizdir. 

    Arzuların astanasında və ya kursantlarla söhbət

Bu məqsəd ətrafında birləşən kursantların bir neçəsi ilə həmsöhbət oluruq. Bildirək ki, kollecdə ölkənin müxtəlif bölgələrindən olan gənclər təhsil alır. Kursant Nihad İbrahimov Beyləqan şəhərində doğulub. Atası baş gizir Elçin İbrahimov bir müddət Naxçıvanda xidmət edib. Nihad da atasının yolunu davam etdirmək üçün təhsilini Naxçıvanda almaq qərarına gəlib. Sərbəst güləş və qaydasız döyüş növü ilə məşğul olan Nihad bir sıra beynəlxalq yarışların iştirakçısı olub. 3 qat Azərbaycan çempionu, göy kəmər ustasıdır. Milli Qəhrəman Mübariz İbrahimov onun həyat idealıdır. Arzularını reallaşdırmaq üçün dərslərini də axsatmır. 
Kursant Havadar Dilavərli Bakı şəhərindəndir. Məqsədi peşəkar hərbçi kimi yetişməkdir. Deyir ki, kollecdə nizam-intizam və tədris şəraiti yüksək səviyyədədir. Bu da imkan verir ki, biz hərbi biliklərə dərindən yiyələnək. 
Fərid Abdullayev Şərur rayonunun Tumaslı kəndindəndir. Atası Amur Abdullayev kimi o da ömrünü hərbə bağlamaq qərarı ilə yolunu kollecdən salıb. Həmkəndlisi Ruzi Həsənov da Fəridlə bərabər bu yolu seçib. Hər ikisi bu yolda qətiyyətlə addımlayır. 
Xəzri Vəliyev Şahbuz rayonunun Keçili kəndindəndir. Keçili kəndi Vətən müharibəsində Mərhəmət Həmzəyev kimi qəhrəman oğul şəhid verib. Xəzri Vəliyev deyir ki, burada yaxşı dostlar qazanmışam. Məqsədimin astanasındayam və çox qürurluyam. 
İsmayıl Quliyev Babək rayonunun Cəhri qəsəbəsindəndir. Uşaqlıqdan qəhrəmanların döyüş yolunu izləyən İsmayıl seçimini edib: qalib Azərbaycan Ordusunda xidmət etmək. Kollecin fəaliyyətə başlaması onu arzusuna bir addım daha yaxınlaşdırıb. 
Vüsal Qənbərov Milli Qəhrəman Kərim Kərimov adına Qarahəsənli kənd tam orta məktəbini bitirib. Şərur rayonunun bu kiçik yaşayış məntəqəsi Vətən torpaqlarının azadlığı uğrunda gedən döyüşlərdə 4 şəhid verib. Kəndin yeniyetmələri hər zaman qəhrəmanları ilə qürur duyub, bu yolu davam etdirənlər az olmayıb. Vüsal da onlardan biridir.
Kollecin zabit, müəllim və kursantları ilə apardığımız söhbətlər, müşahidə etdiklərimiz və aldığımız təəssürat onu deməyə əsas verir ki, bu təhsil müəssisəsi qısa zamanda Azərbaycan Ordusunun döyüş hazır­lığının və ümumilikdə, dövlətin müdafiə qabiliyyətinin artırılması istiqamətində hərbi qulluqçuların hazırlanması işinə yüksək səviyyədə müvəffəq olacaq, ordu sıralarının peşəkar kadrlarla təminatına öz layiqli töhfəsini verəcəkdir.

Ruhiyyə RƏSULOVA