NAXÇIVAN :

04 Aprel 2025, Cümə

Cümə məscidində edilən dualarla qarşıladığımız İlaxır çərşənbə

...

Elimizə, obamıza bahar gəlib. Xoş gəlib, özü ilə səfalar gətirib. Azad torpaqlarımızdan əsən bahar yeli ovqatımızı xoş notlara kökləyib. İndi ürəyimizdə müqəddəs bir arzu varsa, o da gedib ilbəil dəyişən, yenilənən, düşmən bağrı çatladan o torpaqları ziyarət etmək arzusudur. Və bir də, təbii ki, Zəngəzur dəhlizi ilə paytaxta qovuşmaq. 
Torpaq çərşənbəsidir, insanların xüsusi şövqlə, həvəslə hələ qışdan hazırlaşdıqları sonuncu çərşənbə. Bütün məhəllələr indi bişirilən təamların xoş iyi, şirniyyatların ətri və uşaqların şən gülüşləri ilə süslənib. 
Zərif örpəyini uzun, hörüklü saçlarına atmış Möminə xatın anamız yenə övladlarını yığıb başına. Hər kəs bayram libasına bürünüb Əcəmi seyrəngahının seyrinə çıxıb. Dövlət və hökumət nümayəndələri şənlik iştirakçıları ilə birgə bayramı qeyd edir, üzlərdə təbəssüm, gözlərdə sevinc. Tonqal qalanıb. Hamı ətrafına toplanıb, bir-biri ilə bayramlaşır. Milli geyimli qızlar Möminə ananı məmnun etmək üçün gələn qonaqları gülərüz qarşılayır, bayram şirniyyatları təklif edirlər. Dədə Qorqudun duaları, Kosa və Keçəlin məzhəkəsi ilə məclis rövnəqlənir. Xalq mahnılarının, milli rəqslərin sehrinə dalıb Möminə ana. Hər tərəf ala-yaşıla bürünüb. Möminə ana gülür, övladlarını belə xoşbəxt gördükcə. Təzə paltarını geyinib gələn qızlar, oğlanlar Şərqdə qadının şərəfinə ucaldılan ilk abidənin önündə şəkil çəkdirir, Möminə anaya sevgilərini ifadə edirlər. 
Belə gözəl bir gündə – İlaxır çərşənbədə yol gedər Ordubada. Ordubad da bayram libasını geyinib qonaqpərvərliyini sərgiləmək üçün çıxıb qonaqların pişvazına. Hər kəs sevincli və həyəcanlıdır. Bu gün Ordubadda ikiqat bayramdır. 

Ordubadlılara bayram töhfəsi – Cümə məscidi qapılarını açdı

Ordubadlılar tarixən milli dəyərlərə sahib çıxıb, onu göz bəbəyi kimi qoruyublar. Novruz Ordubadda fərqli keçirilər. Bu, fərqlilikdir ki, illərdir, hər bayram Ordubad qonaqlı-qaralı, çal-çağırlı olar.  Milli dəyərlərə sahib çıxdıqları kimi mənəvi dəyərlərə də qədim yurd yerinin sakinləri həssaslıqla yanaşar, qayda-qanunlara riayət edərlər. Ordubad məscidləri Naxçıvanın tarixi abidələr siyahısında xüsusi bir səhifə təşkil edir. Muxtar respublikada ən çox məscid və dini ziyarətgah sayı da elə Ordubaddadır. Cümə məscidi Ordubadın ən qədim və görkəmli məscidlərindən biridir. İnsanların ən sıx toplaşdığı ibadətgahdır. Şəhərin baş meydanında yerləşən Cümə məscidi onun arxitekturasına da xüsusi görkəm və tarixilik bəxş edir. Bu baxımdan məscid şəhərə gələn turistlərin hər zaman diqqət mərkəzində olub. Orta əsrlərə aid memarlıq abidəsinin qapısı üzərindəki daş lövhədə I Şah Abbasın nəsx xətti ilə beş sətirlik fərmanı həkk edilmişdir. 1604-cü ilə aid olan bu fərman şəhər əhalisinin bir sıra vergilərdən azad edilməsi haqqında mətndən ibarətdir.
Öz memarlıq quruluşu ilə bir əzəmət təsiri bağışlayan bu abidə bərpadan sonra bu gün istifadəyə verildi. Yenidən restavrasiya edilən məscid binası özündə həm də sənətkarlıq və yüksək memarlıq sənətini birləşdirir. İlaxır çərşənbə müqəddəs Ramazan ayında dini dəyərlərə xüsusi həssaslıqla yanaşan ordubadlılar üçün Cümə məscidinin istifadəyə verilməsi ilə əlamətdar oldu. Dualar edildi.
İnsan mənəviyyatının paklığında, ucalığında pərvəriş tapır milli dəyərlər. Dəyərlər bir xalqın hansı mədəniyyətə malik olmasının ən ali göstəricisidir. Milli dəyərlər mənəvi dəyərlərlə birləşəndə özünə əbədiyyət qazanır və o xalqın milli kimliyinin pasportuna çevrilir. 
Milli-mənəvi dəyərlərin qorunmasının vacibliyi bu gün dövlətin münasibətində də öz əksini tapır. İlaxır çərşənbə günündə ordubadlıların səbirsizliklə gözlədiyi Cümə məscidinin açılışı, edilən dualar xoş mərama xidmət edər. İnsanlığa, humanizmə xidmət, dəyərlərə hörmət isə Tanrı dərgahında  müstəcəbdir.

Ruhiyyə RƏSULOVA

Nəşr edilib : 18.03.2025 20:35