NAXÇIVAN :

05 Aprel 2025, Şənbə

Naxçıvanda təşkil olunan “Fotojurnalistika” mövzusunda təlimə yekun vurulub

...

Naxçıvan Təlim Mərkəzi və “Şərq qapısı” qəzetinin birgə təşkilatçılığı ilə təşkil olunan “Fotojurnalistika” mövzusunda təlimə yekun vurulub.

Təlimin əsas məqsədi muxtar respublikada fotoqrafiya sahəsində fəaliyyət göstərən şəxslərin bilik və bacarıqlarını artırmaq, onların müasir fotojurnalistika trendləri ilə tanış olmalarına şərait yaratmaqdan ibarət olub. Bir sıra dövlət qurumlarında fəaliyyət göstərən fotoqrafların da iştirak etdiyi təlimin ilk iki günündə Azərbaycan Fotoqraflar Birliyinin təsisçisi, tanınmış fotoqraf Mirnaib Həsənoğlu tərəfindən peşəkar fotojurnalistikanın əsas prinsipləri, reportaj çəkilişlərinin incəlikləri və foto vasitəsilə hadisələri düzgün çatdırmağın yolları öyrədilib.

Təlimin son günü iştirakçılar Ordubad rayonunda öyrəndikləri nəzəri bilikləri praktiki məşğələlərdə yerinə yetirib, ustad fotoqrafın tövsiyələrindən yararlanaraq peşəkar yanaşma metodlarından istifadə ediblər. İlk olaraq təlim iştirakçıları Kotam kəndində olub, Zəngəzur dəhlizi istiqamətində olan yolu və bu tarixi anları fotolarda əbədiləşdiriblər. Qeyd olunub ki, bu dəhliz açıldıqda təkcə Naxçıvan blokadadan çıxmayacaq, eyni zamanda yeni tarixi dövr başlayacaq.

Daha sonra təlim iştirakçıları Ordubad şəhərində Tarix-Diyarşünaslıq muzeyi (Qeysəriyyə), Yusif Məmmədəliyevin ev muzeyi, M.S.Ordubadinin ev muzeyi, M.T.Sidqinin ev muzeyi, Ordubad mədrəsəsi, Buzxana binası, Məbəd abidəsi, Sərşəhər məhəlləsi (Məscid, Çinar, meydan kompleks şəkildə), Mingis məhəlləsi, Anbaras məhəlləsi, Ordubad hamamı, Təkeşiyi məscidi və Cümə məscidini lentə alıblar.

Təlimin sonunda təşkilatçılar tərəfindən iştirakçılara sertifikat təqdim olunub. Mükafatlandırma mərasimində çıxış edən “Şərq qapısı” qəzetinin baş redaktoru Sara Əzimova iştirakçıları salamlayaraq fotojurnalistikanın elementlərindən söz açıb. Foto çəkilişi zamanı fotoqrafların işinin əhəmiyyətindən danışan Sara Əzimova bu sahənin quruculuğunun və düzgün təşkilinin vacibliyini diqqətə çatdırıb, cəmiyyətimizin fotoşəkillər vasitəsilə effektiv işıqlandırılması, obyektlərin fotoşəkillərinin düzgün çəkilməsi və bu zaman səmərəli ünsiyyətin qurulmasına dair üsullar haqqında ətraflı məlumat verib: “Müasir dövrdə fotojurnalistikanın yeni növləri, qolları yaranır və bu sahə getdikcə inkişaf edir. Naxçıvanda bu sahədə olan peşəkar fotoqraflar da həmin inkişafdan uzaq qalmamalı, davamlı özlərini yeniləməli və ən son üsullardan istifadə edərək işlərində yüksək peşəkarlıq nümayiş etdirməlidirlər. Bu baxımdan da deyə bilərəm ki, kecirdiyimiz təlim çox məhsuldar oldu”.

Naxçıvan Təlim Mərkəzinin idarə heyətinin sədri Tağı Tağızadə çıxışında “Şərq qapısı” qəzeti ilə birgə təşkil edilən təlimin önəmindən danışıb, muxtar respublikada fotojurnalistikanın müasir dövrün tələblərinə uyğun olaraq daha çox keyfiyyətli fotoxəbər istehsalının təmin edilməsinə yönələn təşəbbüsü yüksək dəyərləndirib, keçirilən təlimin fotojurnalistlərin bu növ informasiyanın əldə olunması, ötürülməsi və yayımı fəaliyyətində peşəkarlığının və məsuliyyətinin artırılmasına xidmət etdiyini vurğulayıb.

Bu istiqamətdə peşəkar fotoqrafların üzərinə ciddi məsuliyyət düşdüyünü bildirən T.Tağızadə medianın bu sahəsinə böyük diqqət göstərilməli olduğunu, həmçinin fotojurnalistlərin bu təlimlərə cəlbinin Naxçıvanda fotoqrafiya sənətinin inkişafında müstəsna rolunu qeyd edib.

Nəşr edilib : 07.03.2025 17:58