NAXÇIVAN :

06 Aprel 2025, Bazar

Bu gün Şahbuz rayonunun şəhər, qəsəbə və kəndlərində genişmiqyaslı yaşıllaşdırma aksiyası həyata keçirilmişdir

...

Aksiyanın əsas məqsədi ətraf mühitin mühafizəsi, yaşıllıq sahələrinin artırılması və ekoloji tarazlığın qorunması olmuşdur.
Tədbir çərçivəsində rayonun müxtəlif ərazilərində mövcud yaşıllıq sahələrində aqrotexniki qaydalara uyğun olaraq qulluq işləri aparılmış, ərazilər təmizlənmiş, torpaq yumşaldılmış və bərpa tədbirləri görülmüşdür. Ağacların dibləri yumşaldılaraq su və hava mübadiləsi üçün əlverişli şərait yaradılmış, gövdələri isə zərərvericilərə qarşı xüsusi məhlulla ağardılmışdır.
Bununla yanaşı, yaşıllaşdırma aksiyası çərçivəsində rayon ərazisində ümumilikdə  4,5 hektar ərazidə bərpa məqsədilə 585 ədəd tut tingi, eləcə də rayonun şəhər, qəsəbə və kəndlərini əhatə edən 5 hektar sahədə 1750 ədəd meyvə və meşə tingləri əkilmişdir. Əkilən tinglər əsasən yerli iqlimə uyğun növlərdən seçilmiş və onların kök tutması üçün lazımi aqrotexniki tədbirlər görülmüşdür.

Bu cür təşəbbüslər rayonun ekoloji vəziyyətinin yaxşılaşdırılması, eyni zamanda əhalidə təbiətə qarşı qayğıkeş münasibətin formalaşdırılması baxımından mühüm əhəmiyyət daşıyır. Şahbuz rayonunda yaşıllaşdırma və ətraf mühitin mühafizəsi istiqamətində tədbirlərin davam etdirilməsi nəzərdə tutulur.

Nəşr edilib : 05.04.2025 19:05