NAXÇIVAN :

22 Dekabr 2024, Bazar

“Technest” çərçivəsində Naxçıvanda istedadlar yetişməyə davam edir

...

21 dekabr tarixdə "Saat Meydanı"nda “Technest” Təqaüd Proqramı iştirakçılarının məzun günü təşkil olunub. 
İnnovasiya və Rəqəmsal İnkişaf Agentliyi ilə “Coders Azerbaijan”ın birgə əməkdaşlığı çərçivəsində 60 tələbə “Full Stack Proqramlaşdırma” tədris proqramını uğurla yekunlaşdıraraq məzun olub. 
Bu münasibətlə təşkil olunan tədbirdə açılış sözü ilə çıxış edən “Coders Azerbaijan”ın icraçı direktoru Riyad Ağazadə proqramın nəticələri, iştirakçıların uğurları və gələcək planlarla bağlı danışıb.
Sonra proqram iştirakçılarının hazırladıqları layihələrin sərgisinə baxış keçirilib və layihələrin qiymətləndirilməsi aparılıb.
Tədbirdə Azərbaycan Respublikası Gənclər Fondunun Naxçıvan filialının direktoru Arzu Qasımov, Naxçıvan Muxtar Respublikası Ali Məclisinin deputatı Təhminə Babayeva və Naxçıvan Muxtar Respublikası Rəqəmsal İnkişaf və Nəqliyyat Nazirliyinin aparat rəhbəri Əziz Hümbətov çıxış edərək məzunları təbrik edib, layihənin davamlı olmasını arzu ediblər. 
Sonda proqramı müvəffəqiyyətlə bitirən 60 gəncə məzun sertifikatları və hədiyyələr təqdim olunub.
Qeyd edək ki, “Full Stack Proqramlaşdırma” təlimləri 6 ay müddətində təşkil olunmuş və iştirakçılar bu müddət ərzində müasir texnologiyalar sahəsində dəyərli bilik və bacarıqlara yiyələnmişdir.

Nəşr edilib : 21.12.2024 20:05