NAXÇIVAN :

27 Avqust 2026, Cümə axşamı

SOCAR və Çin İxrac-İdxal Bankı enerji sektorunda əməkdaşlıq imkanlarını dəyərləndirib

...

Avqustun 27-də SOCAR-ın prezidenti Rövşən Nəcəf Çin İxrac-İdxal Bankının vitse-prezidenti Vanq Kanqın rəhbərlik etdiyi nümayəndə heyəti ilə görüşüb.

Şirkətdən bildirilib ki, görüşdə SOCAR ilə Çin şirkətləri, eləcə də maliyyə institutları arasında əlaqələrin uğurla inkişaf etdiyi, müxtəlif sahələrdə əməkdaşlığın genişləndirilməsi istiqamətində mühüm layihələrin icra olunduğu bildirilib.

Söhbət zamanı SOCAR-ın Azərbaycanda və ölkəmizin hüdudlarından kənarda həyata keçirdiyi, həmçinin perspektivdə nəzərdə tutulan layihələr barədə məlumat verilib. Çin hökumətinin maliyyə institutu kimi fəaliyyət göstərən bankın xarici investisiyaların və beynəlxalq iqtisadi əməkdaşlığın dəstəklənməsi üzrə icra etdiyi layihələrə dair məlumat təqdim olunub.

Tərəflər enerji sektorunun müxtəlif istiqamətlərində, o cümlədən emal sənayesi sahəsində əməkdaşlıq imkanlarını nəzərdən keçirib, qarşılıqlı maraq doğuran məsələlərə dair fikir mübadiləsi aparıblar.

Nəşr edilib : 27.08.2026 17:33