NAXÇIVAN :

04 Aprel 2025, Cümə

Naxçıvanın parlaq gələcəyi: Zəngəzur dəhlizi ümidləri və strateji addımlar

...

5 mart 2025-ci ildə Türkiyə ilə Azərbaycanın, daha konkret desək, qardaş ölkənin İğdır bölgəsi ilə Naxçıvan Muxtar Respublikasının tarixinə sevinc və qürur dolu bir səhifə yazıldı, hətta qızıl hərflərlə yazıldı desək, daha doğru olar. Həmin gün Ankarada videobağlantı vasitəsilə İğdır-Naxçıvan qaz boru kəmərinin açılış mərasimi keçirildi. Və beləcə bir zamanlar arzu, xəyal olan layihə artıq 5 mart tarixdə reallığa çevrildi. İllərin uğurlu və qətiyyətli siyasətinin təcəssümüdür ki, Naxçıvanın etibarlı enerji təhlükəsizliyi təmin olundu. İğdır-Naxçıvan qaz kəməri, sadəcə, bir infrastruktur layihəsi deyil, iki ölkə arasında keçmişdən bu günə və bu gündən də gələcəyə körpü salan qardaşlıq bağına inamın qürurverici nümunəsidir. Başqa sözlə, qaz boru kəməri “Bir millət, iki dövlət” prinsipinə uyğun olaraq, sözün əsl mənasında, qardaşlıq rəmzidir...

Beləliklə, tarixən “Türkün qapısı” adlandırılan Naxçıvana artıq Türkiyədən yeni bir qapı açıldı. Hər iki ölkə başçısının videobağlantı ilə iştirak etdiyi açılış mərasimi ölkələrarası münasibətlərin dərinləşməsinə xidmət etməklə yanaşı, muxtar respublika sakinləri üçün də unudulmaz anlarla yadda qaldı. Çünki sözügedən qaz kəməri Naxçıvan əhalisinin rifahı və muxtar respublikanın iqtisadi dayanıqlılığın gücləndirilməsi istiqamətində  həyata keçirilmiş mötəbər bir tədbirdir. Bu bir daha göstərdi ki, müstəqil Azərbaycan Respublikasının ayrılmaz bir hissəsi olan Naxçıvana cənab İlham Əliyevin göstərdiyi diqqət və qayğı böyükdür, sonsuzdur...

Regionda enerji təhlükəsizliyinin gücləndirilməsində Bakı-Tbilisi-Ərzurum, TANAP və TAP kimi strateji boru kəmərləri ilə yanaşı, yeni açılan İğdır- Naxçıvan qaz boru kəmərinin özünəməxsus və böyük əhəmiyyəti vardır. Məhz bu boru kəmərləri sayəsində Azərbaycan beynəlxalq arenada enerji sektoru üzrə önəmli bir mövqeyə malikdir. Bu mənada, İğdır-Naxçıvan qaz boru kəməri iki qardaş dövlət arasındakı əlaqələrin yalnız diplomatik və hərbi sahədə deyil, eyni zamanda da iqtisadi əlaqələr üzərində qurulduğunu göstərir. Bütün bu birgə layihələr və dostluq münasibətləri ilə yanaşı, yaxın zamanda səbirsizliklə açılmasını gözlədiyimiz Zəngəzur dəhlizi Naxçıvanın timsalında Azərbaycan Respublikasının bölgədə regional güc olması istiqamətində atılan addımlardır.

Qaz boru kəməri uzun illərdir, blokadanın yaratdığı çətinliklərdən əziyyət çəkən Naxçıvan üçün mühüm perspektivlər açır. Açılış mərasimində Prezident cənab İlham Əliyev Naxçıvanın qədim Azərbaycan torpağı olduğunu və bir əsrdən çoxdur ki, respublikanın əsas hissəsindən ayrı düşərək blokada şəraitində olduğunu da vurğuladı: “Onların planları Naxçıvanı da işğal etmək idi. Ancaq o zaman mənim atam Heydər Əliyev Naxçıvanın rəhbəri kimi buna imkan vermədi və Naxçıvanı qorumaq üçün bütün naxçıvanlılar səfərbər oldular, öz doğma torpaqlarını qorudular və işğalçını yerində oturtdular”.

Ümumilikdə, onu xüsusilə vurğulamaq lazımdır ki, İğdır-Naxçıvan qaz kəmərinin istifadəyə verilməsi tarixən mövcud olan dostluq, qardaşlıq əlaqələri üzərində inkişaf edən, 2021-ci ildə imzalanan Şuşa Bəyannaməsi ilə strateji müttəfiqlik səviyyəsinə yüksələn əlaqələrdə yeni bir mərhələnin əsasını qoydu. Azərbaycan-Türkiyə əməkdaşlıq münasibətlərinin daha da möhkəmləndirilməsinə xidmət edən bu addım bir daha Naxçıvanın türk dövlətləri ilə inteqrasiyanı sürətləndirməsi, birliyin gücləndirilməsi və ortaq dəyərlərin qorunub saxlanılmasında mühüm rol oynadığını, eyni zamanda onun Türk dünyası üçün əvəz edilməz bir məkan olduğunu göstərir. Bu da məlumdur ki, Naxçıvanın Türk dünyasındakı rolu həm coğrafi, həm tarixi, həm də mədəni aspektlər baxımından mühüm əhəmiyyət kəsb edir. Əminliklə demək olar ki, yaxın gələcəkdə Zəngəzur dəhlizinin açılması ilə Naxçıvanın Türkiyə-Azərbaycan dostluğu və Türk dünyası üçün kəsb etdiyi praktiki əhəmiyyət daha da artacaq və bu bölgə iqtisadi layihələr, nəqliyyat yolları və enerji dəhlizləri ilə türk dövlətlərinin daha sıx əməkdaşlıq etməsinə imkan yaradacaq. Naxçıvanla bağlı həyata keçirilən məqsədyönlü tədbirlər və reallaşdırılmağa hazırlanan layihələr muxtar respublika üçün parlaq bir gələcəyin xəbərçisidir... Yaxın vaxtlarda Zəngəzur dəhlizinin açılacağı da şübhəsizdir.

Cavanşir BAĞIRLI

Nəşr edilib : 06.03.2025 13:29