NAXÇIVAN :

04 Aprel 2025, Cümə

Naxçıvanda “Baharfest” çərçivəsində könüllülər aktiv fəaliyyət göstərib

...

“Əcəmi Seyrəngahı”nda, Novruz bayramı münasibətilə “Baharfest” təşkil olunub. Baharın gəlişini simvolizə edən bu festivalda könüllülər ilk gündən aktiv iştirak edirlər. Naxçıvan Muxtar Respublikası Ekologiya və Təbii Sərvətlər Nazirliyinin təşkilatçılığı ilə keçirilən “Tullantıları tinglərə dəyiş” aksiyası zamanı nazirliyin könüllüləri də yaxından iştirak edib.

Festival iştirakçılarını Novruz bayramı münasibətilə təbrik edən ekologiya könüllüsü Pərvəri Məmmədəliyeva gördükləri işlər barədə fikirlərini bölüşdü:

“Bu gözəl Novruz günlərində arzu edirəm ki, təbiətə olan sevgimiz artsın, yaşıllıqlar çoxalsın, torpağımız daim bərəkətli və abad olsun!  Biz festival çərçivəsində tullantıların çeşidlənməsi və ətraf mühitin qorunması ilə bağlı maarifləndirmə işləri aparırıq. Plastik, kağız və şüşə tullantılar gətirənlərə meyvə ağaclarının tinglərini hədiyyə edirik. Bu həm təbiətə töhfədir, həm də insanlarda ekoloji mədəniyyətin formalaşmasına kömək edir.

Burada olmaq mənə böyük sevinc bəxş edir. İnsanlara faydalı olmaq, ekoloji dəyərləri aşılamaq və yaşıllığın artırılmasına töhfə vermək qürurvericidir. Festivalda hər kəsin ekoloji maariflənməyə maraq göstərməsi bizi daha da həvəsləndirir.

Ekoloji könüllü kimi fəaliyyətimi davam etdirmək, daha geniş miqyasda maarifləndirmə işləri aparmaq istəyirəm. Yaşıllıqların artırılması və tullantıların düzgün idarə olunması sahəsində müxtəlif layihələrdə iştirak etmək mənim üçün vacibdir”.

Ekologiya könüllüsü Rəhman Həsənov isə festival çərçivəsində görülən işlərlə bağlı fikirlərini bu cür ifadə etdi:

“Öncəliklə hər kəsi Novruz bayramı münasibəti ilə təbrik edirəm! Könüllülər olaraq həm əhaliyə yaxından dəstək göstərmək və məlumatlandırmaq, həm də ekologiyanın təmiz saxlanılması ilə bağlı maarifləndirici tədbirlərin görülməsində qabaqcıl şəkildə iştirak edirik. Biz tullantıların çeşidlənməsi və təkrar emalın vacibliyi barədə insanları məlumatlandırırıq. Festival iştirakçıları tullantıları gətirib təhvil verdikdə, onlara ərik, qoz, tut, badam kimi ağac tingləri təqdim edirik. Bu, ətraf mühitə töhfə verməyin ən gözəl yollarından biridir.

Görülən işlər əhali tərəfindən çox müsbət qarşılanır. İnsanlar plastik və digər tullantıları təhvil verməyə həvəslidirlər, çünki bunun qarşılığında təbiətə fayda verən tinglər alırlar. Bu həm də ekoloji şüurun formalaşmasına kömək edir.

Təbiəti qorumaq hər kəsin borcudur. Biz könüllü olaraq bu istiqamətdə fəaliyyətimizi genişləndirmək, insanları ekoloji problemlərə daha həssas yanaşmağa sövq etmək niyyətindəyik. Novruz bayramı bolluq, bərəkət və yenilənmə rəmzidir. Arzu edirəm ki, bu bahar hər kəs üçün təmiz və yaşıl bir gələcəyin başlanğıcı olsun!”

Rafiq TƏHMƏZ

Nəşr edilib : 20.03.2025 15:30