NAXÇIVAN :

23 Noyabr 2024, Şənbə

Naxçıvan məktəbliləri Beynəlxalq Yaşıl STEAM Azərbaycan Festivalında iştirak edəcək

...

"Şərq qapısı" xəbər verir ki, 24-25 oktyabr tarixlərdə Bakı Ekspo Mərkəzində Azərbaycan Respublikası Elm və Təhsil Nazirliyinin dəstəyi və “STEAM Azərbaycan” layihəsinin təşkilatçılığı ilə Beynəlxalq Yaşıl STEAM Azərbaycan Festivalı keçiriləcək.
Festivalda Naxçıvan Muxtar Respublikasının  ümumtəhsil məktəblərinin şagirdlərindən ibarət  STEAM Təlim-Tədris Mərkəzinin də iki, Vex IQ kateqoriyası üzrə RoboGenius,  Fly Tech  kateqoriyası üzrə isə  Griffin komandası iştirak edəcək.   Festivalda iştirak edəcək komandalar artıq bütün hazırlıq işlərini  yekunlaşdırıb və bu gün Bakı şəhərinə yola düşəcəklər.  
Qeyd edək ki, festivalın keçirilməsində əsas məqsəd STEAM əsaslı tədrisin təşviqi, təhsilalanlar arasında XXI əsr bacarıqlarının inkişaf etdirilməsi, yaradıcı təhsilalanların aşkara çıxarılmasıdır. Həmçinin BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) Azərbaycanda keçirilməsi və 2024-cü ilin ölkəmizdə “Yaşıl dünya naminə həmrəylik ili” elan edilməsi ilə əlaqədar STEAM əsaslı yanaşmanın tətbiqi ilə ətraf mühitin sağlamlaşdırılması, su ehtiyatlarından və alternativ enerji mənbələrindən səmərəli istifadəyə dair innovativ həll və layihələrin hazırlanmasının təşviq edilməsi məqsədlər sırasındadır. 
Bu il artıq 4-cü dəfə keçirilən STEAM Azərbaycan Festivalında 8 yarış və 1 sərgi-yarış (Yaşıl təşəbbüslər) kateqoriyası üzrə yarışlar təşkil olunacaq.
Festivalda yerli komandalarla yanaşı, Türkiyə, Pakistan, Türkmənistan, Qazaxıstan, Çexiya, Slovakiya, ABŞ və digər xarici ölkə komandaları da yarışacaqlar.

Nəşr edilib : 23.10.2024 12:25