Naxçıvan Dövlət Texniki Kollecinin yaradılmasının 100 illiyi münasibətilə Naxçıvan Muxtar Respublikası Ali Məclisi sədrinin birinci müavini Bəxtiyar Məmmədov kollecin bir qrup əməkdaşının təltif edilməsi haqqında Sərəncam imzalayıb.

Biz də orta ixtisas təhsilinin inkişafındakı səmərəli fəaliyyətlərinə görə təltif edilən müəllimlərin təəssüratlarını öyrəndik:

Naxçıvan Dövlət Texniki Kollecində şöbə müdiri vəzifəsində çalışan Türkan Hüseynova: “Qürur və sevinc, eyni zamanda məsuliyyət hissi yaşayıram. Əməyimin qiymətləndirilməsi məni çox sevindirir. Təltif olunmağım mənim bundan sonra da daha yaxşı çalışmağım üçün bir stimuldur. Qazandığım uğur, sadəcə, mənim deyil, eyni zamanda kollektivimizin uğurudur. 100 yaşını qeyd edən bu kollecin bütün əməkdaşlarını təbrik edirəm. Verilən yüksək dəyərə görə dövlətimizə minnətdarlığımı bildirirəm. Bizə göstərilən bu ehtimadı doğruldacağımıza inanıram”.

Kollecdə fizika fənnini tədris edən Gülər Bayramova deyir: “İlk olaraq bizi dəyərləndirdiyi üçün muxtar respublika rəhbərliyinə minnətdarıq. Bu təltif olunma məni və ailə üzvlərimi, eyni zamanda kollektivimizi çox sevindirir. Bu mükafat mənim üçün böyük bir şərəfdir. Bu yalnız mənim şəxsi zəhmətim deyil, həm də təhsil sahəsində fəaliyyət göstərən kollektivimizin və dövlətdən aldığımız dəstəyin nəticəsidir. Bu təltif, həmçinin  dövlətimizin bizə göstərdiyi etimadın bir göstəricisidir. Mənim üçün bu, gələcəkdə daha da səylə çalışmaq üçün bir motivasiyadır. Bizim əsas məqsədimiz vətənpərvər, güclü və bilikli gənclər yetişdirməkdir. Təhsil vasitəsilə gənclərə Vətənə xidmətin əhəmiyyətini aşılamaq və onları bu yolda düzgün istiqamətləndirmək çox vacibdir. Bu mükafat gənclərimizə Vətənə xidmətin hər zaman qiymətləndirildiyini göstərir. Gənclər görməlidirlər ki, fədakar insanlar öz ölkələrinə verdikləri xidmətlərlə tanınır və mükafatlandırılırlar. Bu, gəncləri daha da ruhlandırır və onlara öz üzərlərində daha çox çalışmağa ilham verir. Kollecimizin uğurlarını artırmaq və ölkəmizə faydalı kadrlar yetişdirmək üçün daha əzmkarlıqla çalışacağam. Tələbələrimizə təhsil verərkən onları həm də vətənpərvər, bilikli və məsuliyyətli vətəndaşlar kimi yetişdirməyi əsas məqsədim olaraq görürəm”.

Kimya-biologiya müəllimi Samirə Mustafayeva: “Rəşadətli əməyə görə” nişanı ilə təltif olunmaq mənim üçün böyük şərəfdir. Bu mükafat yalnız mənim şəxsi fəaliyyətimə verilən qiymət deyil, eyni zamanda təhsil sahəsinə və müəllim əməyinə göstərilən diqqətin bariz nümunəsidir. Bu mənim üçün həm böyük qürur hissi, həm də gələcək fəaliyyətimdə daha da məsuliyyətlə çalışmağım üçün bir stimuldur. Tədris prosesində daim yeniliklər tətbiq etməyə, fənnin daha effektiv və maraqlı şəkildə öyrədilməsinə səy göstərmişəm. Mənim üçün müəllimlik yalnız bilik vermək deyil, həm də elmə və öyrənməyə maraq yaratmaqdır. Kimya və biologiya sahəsində tələbələrin nəzəri biliklərlə yanaşı, praktik bacarıqlar əldə etməsinə xüsusi önəm verirəm. Hər bir müəllim üçün ən böyük nailiyyət tələbələrinin uğurlarıdır və bu uğurları gördükcə daha böyük həvəslə çalışıram. Dövlətimiz tərəfindən təhsil sahəsinə göstərilən diqqət biz müəllimlər üçün çox dəyərlidir və bu, gələcək fəaliyyətimdə daha böyük əzmlə çalışmağa, tədris metodlarını daha da təkmilləşdirməyə və tələbələrimizə daha faydalı olmağa ruhlandırır.

Mükafata layiq görülən bütün həmkarlarımı səmimi-qəlbdən təbrik edir, hər birinə gələcək fəaliyyətlərində uğurlar arzulayıram!”

Azərbaycan dili və ədəbiyyat fənnini tədris edən Səadət Qasımova: “Ölkəmiz üçün layiqli kadrların yetişdirilməsinə səy göstərmişəm. Pedoqoji fəaliyyətim müddətində  daim dövlətçilik prinsiplərini əsas götürmüşəm və dövlət dilimiz olan Azərbaycan dilinin saflığı və təmizliyini qorumağa çalışmışam. Gənc nəslin yetişdirilməsi üçün göstərdiyim müəllimlik fəaliyyətində daim dövlətimizin qayğısını hiss etmişəm. Tədrisin yüksək səviyyədə aparılması üçün kollecimizdə hər cür şərait yaradılmışdır. Müəllimlik fəaliyyətim yüksək qiymətləndirilmiş və “Naxçıvan Muxtar Respublikasına xidmətlərə görə” nişanı ilə təltif olunmuşam. Əməyimə verilən bu yüksək dəyərə görə öz minnətdarlığımı bildirirəm”.

İqtisadiyyat yönümlü ixtisas fənlərinin tədrisi üzrə müəllim vəzifəsində çalışan Ruziyyə Rzayeva bildirdi. “Bu sahədə tədris fəaliyyətimdə əsas məqsədim ölkəmizin inkişafı üçün savadlı və peşəkar kadrların yetişdirilməsi istiqamətində əlimdən gələni əsirgəməməkdir. Tədris sahəsindəki fəaliyyətimə  görə “Rəşadətli əməyə görə” nişanı ilə təltif olunmuşam. Bu mükafat mənim uzun illər boyu göstərdiyim zəhmətin və pedaqoji fəaliyyətimə verilən yüksək qiymətin təzahürüdür. Dövlətimizə pedaqoji fəaliyyətimə göstərdiyi diqqət və dəstəyə görə dərin minnətdarlığımı bildirirəm.

Biz də müəllimləri təbrik edir, fəaliyyətlərində uğurlar arzulayırıq.

         Bülbül QULİYEVA

 Rafiq TƏHMƏZOV