NAXÇIVAN :

04 Aprel 2025, Cümə

IELTS imtahanında yüksək nəticə göstərən NDU nəzdində Gimnaziyanın şagirdi: “NDU-da IELTS mərkəzinin olması çox böyük fürsətdir”

...

Azərbaycan ali təhsil məkanında ilk dəfə olaraq Naxçıvan Dövlət Universitetində (NDU) 2022-ci yaradılan IELTS Qeydiyyat və İmtahan mərkəzi yüksək nəticələr təqdim etməkdə davam edir. 
Növbəti yüksək nəticə Naxçıvan Dövlət Universiteti (NDU) nəzdində Gimnaziyanın 11-ci sinif şagirdi Məcid Səfərlidə qeydə alınıb.  O, 13 mart tarixində  IELTS mərkəzində kompüter əsaslı akademik IELTS imtahanına girərək maksimum 9 bal üzərindən 7.5 bal toplayıb. Bu nəticə ilə Çin və İngiltərədə bir sıra prestijli universitetlərə qəbul almaq üçün baş vurub.
“Naxçıvan Dövlət Universitetində  IELTS mərkəzinin olması çox böyük fürsətdir” , –  bu sözləri müsahibəsində bildirən Məcid əvvəllər  imtahan vermək üçün başqa yerlərə və ya xaricə getməli olduğunu deyib. Hazırda isə Naxçıvan Dövlət Universitetində  imtahanı vermək imkanının olmasını çox böyük fürsət və rahatlıq olduğunu söyləyib.
Məcid IELTS proqramına hazırlaşmadan öncə İngilis dilini B1 səviyyəsində bildiyini qeyd edib:  “Qrammatika və oxuma sahələrində yaxşı idim, amma danışıq bacarığım zəif idi. IELTS-ə hazırlıq zamanı isə bu sahədə özümü inkişaf etdirdim.  Mən IELTS imtahanını 13 mart tarixdə Naxçıvan Dövlət Univeritetində verdim. İmtahan biraz mənim üçün stresli keçdi, xüsusilə dinləmə hissəsi imtahanın əvvəlində olduğu üçün bir az stress yaşadım. Amma, ümumilikdə, yaxşı nəticə əldə etdim və 7.5 bal topladım”
Xatırladaq ki, NDU IELTS Qeydiyyat və İmtahan mərkəzi Britaniya Şurası və Naxçıvan Dövlət Universitetinin əməkdaşlığı ilə fəaliyyətə başlayıb. Bu günə qədər mərkəzdə 250-dən artıq müəllim, tələbə və şagird imtahan verib.  Eyni zamanda universitetdə 2023-cü ildən fəaliyyət göstərən SAT Qeydiyyat və İmtahan mərkəzi də var. Burada da 216 şagird imtahan verib, 5 nəfər İran və Türkiyə vətəndaşı imtahanlarda iştirak edib. NDU-dakı beynəlxalq imtahan mərkəzləri IELTS, SAT xarici universitetlərdə təhsil almaq istəyən şagirdlərə təhsilə əlçatanlığını təmin edir. 
Naxçıvan Dövlət Universiteti (NDU)  IELTS Qeydiyyat və İmtahan mərkəzində növbəti rəsmi IELTS imtahanı 17 və 18 aprel tarixlərdə  təşkil olunacaq.

Nəşr edilib : 20.03.2025 13:52