NAXÇIVAN :

26 Aprel 2025, Şənbə

Fitrə zəkatı kimlərə verilməlidir?

...

Fitrə zəkatı Ramazan ayının sonunda hər bir müsəlmanın verməli olduğu vacib bir sədəqədir. Bu ibadət həm oruc ibadətimizin nöqsanlarını aradan qaldırır, həm də cəmiyyətin yoxsul və imkansız üzvlərinə yardım etməklə sosial ədaləti təmin edir. 
“Şərq qapısı”na açıqlamasında Naxçıvan Muxtar Respublikası Qazısı Əli Orucov bildirib: "Fitrə sözü ərəb mənşəlidir və fitr kökündən gəlir. Fitr sözü "orucu açmaq", "iftar etmək" və ya "yaradılış" mənalarını ifadə edir. Bu baxımdan fitrə iki əsas mənada işlənə bilir.  Bunlardan biri orucun sona çatması ilə bağlı mənası – Ramazan ayının bitməsini və bayram günündə verilən sədəqəni və  insan fitrəti (yaradılışı) ilə bağlı mənası var ki, çünki fitrə zəkatı insanın yaradılışına görə vacib sayılan bir borc kimi qəbul edilir. Bu səbəbdən fitrə zəkatı həm orucun tamamlanması, həm də insanın fitrəti (yaradılışı) ilə bağlı bir ibadət olaraq görülür".
Muxtar respublika qazısı vurğulayıb ki, "Allah-Təalanın bizə bəxş etdiyi nemətlərin ən dəyərlilərindən biri də Ramazan ayıdır. Bu ayda oruc tutmaqla nəfsimizi tərbiyə etdik, Allahın razılığını qazanmağa çalışdıq və günahlarımızın bağışlanmasını dilədik. Ramazan ayının sona çatması ilə birlikdə müsəlmanlar üçün böyük bir bayram – Ramazan bayramı gəlir. Fitr bayramı İslamın əsas bayramlarından biridir və Şəvval ayının 1-də qeyd edilir. Bu bayram sevinc, paylaşma və qardaşlıq ruhunu gücləndirir. Bayramın əsas simvollarından biri də fitrə zəkatıdır ki, bu, Ramazan ibadətimizin tamamlanmasının və sosial məsuliyyətimizin göstəricisidir".
"Oruc tutan bir müsəlman bilməlidir ki, oruc tutmaq yalnız aclıq və susuzluğa dözməkdən ibarət deyil", – deyən Əli Orucov qeyd edib ki, orucla bərabər dilimizi, gözümüzü, qulağımızı və qəlbimizi günahlardan qorumaq əsas şərtdir: "Buna görə də fitrə zəkatı, oruc zamanı bilmədən etdiyimiz kiçik nöqsanların bağışlanmasına və ehtiyacı olanların sevindirilərək bayramı hiss etməsinə xidmət edir. Əsasən, fitrə zəkatı hər bir müsəlman üçün vacibdir. Fitrə zəkatı vermək yalnız maddi imkan sahibləri üçün deyil, ailəsinin gündəlik ehtiyaclarından artıq mala sahib olan hər kəs üçün vacibdir. Bu zəkat, əsasən, qida məhsulları ilə – xurma, kişmiş, düyü, makaron, qarabaşaq (qreçka), noxud, bulqur və bu kimi gündəlik ərzaqla müəyyən edilir. Peyğəmbər (s.a.s) hər kölə və ya azad, kişi və ya qadın, kiçik və ya böyük müsəlmana fitrə zəkatını  xurma və ya arpa çıxarmağı vacib etmişdir. Həmçinin camaat bayram namazını qılmadan öncə bu fitrəni çıxarmağı əmr etmişdir".
Müsahibimiz onu xüsusilə vurğulayıb ki, fitrə zəkatı yalnız ehtiyacı olan kasıblara verilməlidir: "Peyğəmbərimiz belə buyurmuşdur ki, miskinlər üçün toxluq olsun deyə vacib edilmişdir. Bayram günləri oruc tutmaq günahdır. Bayram namazı oruclu halında qılınmaz. Müsəlman bayram namazı qılmazdan qabaq mütləq yemək yeməlidir. Artıq ramazanın son günlərinə çatmışıq. İndi isə bayram sevincini yaşamaq, Allahın bizə verdiyi bu gözəl günləri həm özümüz, həm də başqaları üçün ən yaxşı şəkildə dəyərləndirmək vaxtıdır. Gəlin bu mübarək günlərdə bir-birimizə dəstək olaq, Allahın bizə bağışladığı nemətlərə şükür edək və fitrə zəkatımızı düzgün şəkildə yerinə yetirək".

Bülbül Quliyeva

Nəşr edilib : 26.03.2025 16:25