Düz dörd il əvvəl, 27 sentyabr səhəri xalqımızın ən yeni tarixinin yazılmağa başladığı günün ilk dəqiqələrindən bütün Azərbaycanı ayağa qaldıran ilk xəbərlər gəlməyə başladı. Qəhrəman Azərbaycan Ordusu torpaqlarımızı murdar düşmən tapdağından azad etmək üçün hərəkətə keçmişdi! Azərbaycan Respublikasının Prezidenti Silahlı Qüvvələrimizin Ali Baş Komandanı cənab İlham Əliyevin “Qarabağ Azərbaycandır!” nidasından qorxuya düşən erməni faşizminin başını son olaraq birdəfəlik əzib bu dünyanın pozulmuş ədalətini bərpa etmək üçün döyüşə atılan şanlı Ordumuzun önündə 44 günlük bir zəfər yolu başlamışdı.

Vətən müharibəsinin ilk saatlarından azad edilən torpaqlarımıza qovuşmağın sevinci ilə daha da coşan xalqımızın son 200 illik tarixində dönüş nöqtəsi olan 27 sentyabr – Anım Günü uca şəhidlərimizin xatirəsinə dərin hörmət və ehtiram, həm də Azərbaycanı ədalətli sülhə aparan böyük yolun başlanğıcı kimi də tarixdə yaşayacaq. Uzun illər boyu işğal və sürgünlərdən əziyyət çəkmiş, əraziləri hissə-hissə qoparılıb ermənilərə hədiyyə olunmuş Azərbaycan torpaqlarında ədalətin bərpası üçün başlanan 44 günlük Vətən müharibəsi Ali Baş Komandanımızın qətiyyəti, əsgərlərimizin şücaəti ilə yanaşı, özünün keçirilmə zamanı, taktikası, istifadə olunan yeni hücum silahlarının uğurlu tətbiqi ilə dünya hərb tarixində də yeni bir dövrün başlanğıcı oldu. Otuz il işğal altında qalmış torpaqlarının azadlığı üçün irəli atılan şanlı Ordumuz on illər ərzində möhkəmləndirilmiş müdafiə istehkamlarını yararaq Qarabağın ürəyi Şuşaya doğru yol aldı. Ali Baş Komandanın mükəmməl hərb diplomatiyası ilə susdurulan bütün ermənipərəst siyasətçi və medianın qaragüruhuna və çürük erməni ordusunun mülki vətəndaşlarımızı da hədəf aldığı son çırpıntılarına baxmayaraq, uğurla başladılan və zəfərlə başa çatan Vətən müharibəsi hamının ürəyincə olan ədalətin də təntənəsi oldu.  

İnsan həyatının mənası bu dünyanı doyunca, xoşbəxt yaşayıb ömrü boyunca Uca Yaradanın nəsibindən ona düşəni pay almaqdır. Dünyaya gələn hər bir insanın doğma ata-baba yurdunda sülh içində, ailəsinin, övladlarının yanında yaşaya bilmək, gün-güzəran sahib olmaq kimi təməl bəşəri hüquqları həm müqəddəs kitablarda, həm də dövlətlərin təsbit etdiyi beynəlxalq hüquqda da öz əksini tapmışdır. Amma tarix bilinəndən qolu güclünun, arxalının bu hüquqları daim pozduğunu da kim bilmir ki?! Başqa torpaqların işğalı, dinc, silahsız insanların qətli, köçkün həyatı, yoxsulluq, aclıqdan ağlayan körpələr, səfalət və vətəndən uzaqlardakı nisgilli ölüm! Bütün bunlar göyün yeddinci qatından baxanda hamının sanki eyni həyatı yaşadığı, amma əslində, güclünün gücsüzə zülm etdiyi qoca Yerin üzərindəki min illər boyu bilinən tarixin acı tablosu, qan qırmızı rənglərlə yoğrulmuş bir palitrasıdır. Torpaq hərisləri olan imperiya başçılarının və onların ermənilər kimi zaman-zaman istifadə edib, sonra da gözdən saldıqları yaltaq əlaltılarının heç zaman çata bilmədikləri utopik böyük dövlət xülyaları, son nəticədə, iflasa uğrasa da yerində arzularına qovuşmadan qara torpağa gömülmüş milyonlarla gəncin məzarı, başsız ailələr, işıqsız yuvalar qalmışdır. Nə yazıq ki, bu tarix Qərblə Şərqin astanasındakı Azərbaycandan da yan keçməmiş, bir zamanlar 2 milyon 800 min kvadratkilometrlik nəhəng Azərbaycanı bölmüş Kürəkçay, Gülüstan və Türkmənçay müqavilələri nəticəsində bugünkü ədalətsiz xəritə ilə üz-üzə qalmışıq. Amma hər qaranlıq gecənin bir gündüzü də var, – deyirlər. İrəvanın, Göyçənin, Zəngəzurun ermənilərə hədiyyə olunması ilə onsuz da parçalanmış Azərbaycanın Qarabağına da iştahlanan ermənilərin bu son yağlı tikəni həzm edə bilməyib, köçürüldükləri torpaqlardan cəhənnəm olub getmələri də ədalət çarxının, nəhayət ki, doğru yönə dönməsi, üfüqdə parlayan ulduzların bizim üzümüzə gülməsi ilə yadda qaldı. Və beləcə, otuz il əvvəl başlatdıqları qanlı separatizm əməllərinin qanuni nəticəsini yaşayan başıaşağı ermənilərin düşdüyü miskin vəziyyət də gec, amma güc gəlmiş ədalətin təntənəsidir.

“Ədalət gözlənilmir, ədaləti gərək bərpa edəsən”, – deyən dövlət başçımız öz çıxışlarında həmişə bunun qazanılması üçün “ətalət” gəlməsindən çox uzaq olan çalışqanlıq, güc, enerji, dinamik inkişafı qarşıya məqsəd qoyur, uca şəhidlərimizin qanı bahasına qovuşduğumuz tam suverenliyimizi qorumaq, kimsədən asılı olmamaq üçün güclü olmağı, güclü olmaq üçün isə həmrəy olmağı vurğulayır. Çünki düzəni çoxdan pozulmuş bu dünyada nə azərbaycanlılar, nə də heç kim başqasının gücü altında əzilməməsi üçün daim dostlarının sayını artırmalı, güclü iqtisadiyyata və güclü orduya sahib olmalıdır.

Bax budur bu dünyanın ədaləti!

Şəlalə  CABBAROVA

Naxçıvan  şəhər  Heydər  Əliyev adına

  məktəbin müəllimi