NAXÇIVAN :

04 Aprel 2025, Cümə

1 aprel – Beynəlxalq Quşlar Günü Araz Su Anbarı ətrafında qeyd olunub

...

Naxçıvan Muxtar Respublikası Ekologiya və Təbii Sərvətlər Nazirliyinin təşkilatçılığı ilə ekokönüllər Araz Su Anbarı ətrafında olublar. 30-dan çox könüllünün iştirak etdiyi tədbirin əsas məqsədi quşların qorunması və mühafizəsi mövzusunda gənc nəslin maarifləndirilməsi, həmçinin ictimaiyyətin ekologiyaya olan diqqətinin artırılmasıdır.
İlk olaraq ekokönüllülərə Beynəlxalq Quşlar Gününün qeyd edilməsinin məqsədi və əhəmiyyəti haqqında geniş məlumat verilib. Ekoloji maarifləndirmənin vacibliyi vurğulanaraq quşların ekologiyadakı roluna diqqət çəkilib. 
Naxçıvan Muxtar Respublikası Turizm Departamentinin sektor müdiri Orxan Cəfərov bildirib ki, son dövrlərdə turizmin inkişaf etdiyi bir sıra ölkələrdə maraqdoğuran quş gözləmçiliyinin zəngin təbiəti ilə seçilən muxtar respublikada da inkişaf etməsi üçün imkanlar mövcuddur.
Daha sonra könüllülər binokllar vasitəsilə ərazidə mövcud olan müxtəlif ornitofauna növlərini müşahidə ediblər. Bu müddət ərzində onlara müxtəlif quş növləri,  onların həyat tərzi, mühafizəsinin vacibliyi və ekosistemdəki rolu haqqında ətraflı məlumat verilib, gənclər təbiətlə daha yaxından tanış olublar. 
Xatırladaq ki, vəhşi quşların sayını və növ müxtəlifliyini qorumaq, insanları vəhşi təbiətin mühafizəsinə cəlb etmək məqsədilə hər il aprelin 1-i “Beynəlxalq Quşlar Günü” kimi qeyd olunur. 1906-cı il aprelin 1-də quşların mühafizəsinə dair Beynəlxalq Konvensiya imzalanıb. 
Beynəlxalq Quşlar Günü hər il UNESCO tərəfindən “İnsan və Biosfer” adı ilə xüsusi proqram çərçivəsində keçirilir.

Nəşr edilib : 01.04.2025 19:26