Xok: Azərbaycanın Qəhrəman Yurdu

Uşaq vaxtı Naxçıvandan Şərura gedəndə yolun sağında Kəngərlinin Xok kəndini görəndə sevinirdim. Bilirdim ki, artıq kəndimizə çatmağımıza az qalıb. O zaman Xok mənim üçün sadəcə bir kənd idi-isti yuvaların, mehriban insanların yaşadığı kiçik bir məkan.
İllər keçdi, indi isə Xok kəndindən keçəndə tamam başqa hisslər keçirirəm-qürur, hüzn, minnətdarlıq… Üç hərfə sığan bu kənd Vətənin ən dəyərli oğullarını yetişdirib. İkinci Qarabağ müharibəsində Xokun yeddi igidi şəhid oldu. Yeddi igid- torpaqdan Vətən yaradan, canını torpağa qatıb onu müqəddəs edən yeddi qəhrəman.
Bu gün həmin qəhrəmanları dünyaya gətirən analarla görüşdük. Hər birinin gözündə həm sevinc, həm qürur, həm də bir parça həsrət vardı. Onların müqəddəs əllərindən öpüb bayramlaşdıq, övladlarının xatirəsinin yaşadıldığı və "Şərq qapısı" qəzetinin hazırladığı “100 ilin qəhrəmanları” kitabını təqdim etdik. O an onların baxışlarında bir anlıq oğullarına qovuşma sevinci vardı.
Xokun 40-a yaxın döyüşçüsü və qazisi var. Hər biri bir tarix, hər biri bir qəhrəmanlıq dastanı... Bu torpaq təkcə bir kənd deyil, bu torpaq bütöv bir Vətəndir. Azərbaycanın qəhrəman yurdu-Xok!

Sara Əzimova