NAXÇIVAN :

05 Aprel 2025, Şənbə

XII Qlobal Bakı Forumundan dünyaya verilən mesajlar

...

Dünya artıq yeni bir düzənin quruluş ərəfəsindədir. Bu gün qlobal miqyasda gedən prosesləri diqqətlə analiz edərkən qarşılaşdığımız həqiqət budur ki, güclü lideri olan və  düşünülmüş siyasi xətt yürüdən ölkələr öz müqəddəratlarını müəyyən etmək hüququ əldə edə bilirlər. Əks təqdirdə, tarixin ağır və qaranlıq faciələrindən qaçmaq mümkün deyil. Ötən əsrin 90-cı illərində Ulu Öndər Heydər Əliyevin Azərbaycanı dünyanın qabaqcıl ölkələrindən birinə çevirmək missiyasının XXI əsrdə cənab İlham Əliyev tərəfindən yeni müstəvidə davam etdirilməsi dünyada Azərbaycan möcüzəsinin yaranmasına gətirib çıxardı. Nəticədə, bu gün regionun ən güclü dövləti kimi Azərbaycan günü-gündən daha da inkişaf edir və beynəlxalq arenada güclü bir ölkə kimi nüfuz sahibinə çevrilir. Prezident İlham Əliyevin “Dünya düzəninin yenidən düşünülməsi: çağırışların fürsətə çevrilməsi” mövzusundakı XII Qlobal Bakı Forumundan dünyaya müraciəti Azərbaycanın yeni dünya düzənindəki yeri və ölkəmizin dünyanın rifahı üçün həyata keçirəcəyi siyasəti bir daha təsdiqləməklə dünyaya göstərmiş oldu.

         Bu gün dünyada lidersizliyin ölkələr üçün böyük bir böhran qaynağı hesab edildiyi bir zamanda Azərbaycan güclü və uzaqgörən lideri ilə qarşısında yeni üfüqlər aça bilib. Prezident cənab İlham Əliyevin ölkəmizə rəhbərliyi dövründə həyata keçirdiyi siyasi dəst-xətt ölkəmizdə bütün sahələri əhatə edən güclü dövlətçilik strukturu yaradıb və uğurları özündə ehtiva edən bu siyasi xətt bir çox xarici siyasi institutlar tərəfindən yüksək qiymətləndirilərək diqqətlə öyrənilir. Çox deyil, 30 ildən bir az artıq bir dövr öncə tarix səhnəsindən birdəfəlik silinməklə üz-üzə qalan bir ölkədən bu gün ağızdolusu danışılması, sözün əsl mənasında, siyasi möcüzə hesab edilir.

XXI əsrin ilk rübünü geridə qoymağa hazırlaşdığımız bu dövrdə Azərbaycan artıq yeni dünya düzəninə hazırlıq və bu düzənin ölkələr üçün yaratdığı fürsətlər üzərində proqnozlar ortaya qoyan yeni bir perspektiv irəli sürməkdədir. Xüsusilə Rusiya-Ukrayna müharibəsindən sonra böyük enerji böhranı ilə üz-üzə qalan Avropa məkanı ölkəmizin enerji siyasəti və qərbə enerji ixracatının artırılması hesabına bu böhranı böyük ölçüdə minimallaşdıra bilib. Dünyada ölkələrarası əlaqələrin inkişaf etdirilməsinin vacibliyini ortaya qoyan Azərbaycan öz enerji ehtiyatlarını digər dövlətlərlə bölüşərək qarşılıqlı iqtisadi-siyasi əlaqələri də, beləliklə, möhkəmləndirir. Qlobal Bakı Forumunda ölkə başçısının dedikləri də bunu bir daha təsdiq edir: “Təsadüfi deyil ki, Avropa Komissiyası Azərbaycanı etibarlı tərəfdaş və Pan-Avropa enerji təchizatçısı kimi tanıyır. Bir sözlə, bu gün Azərbaycandan nəql olunan neft və qaz bir çox ölkələrin enerji təhlükəsizliyində və əslində, onun möhkəmləndirilməsində həqiqətən böyük dəyişiklik yaradır. Buna “yaşıl enerji” mənbələrimizi, o cümlədən Azərbaycandan Avropaya gedən, qismən Qara dənizin dibi ilə çəkilən yeni enerji kabelini əlavə etsək, bu, məsuliyyətimizin digər təzahürü və bir çox ölkələrlə sıx tərəfdaşlıq münasibətlərimizin nümayişidir. Təkcə enerji sərvətlərinin olması kifayət deyil. Siz gərək qonşularınızla, onların qonşuları ilə yaxşı münasibətdə olasınız ki, enerji, təhlükəsizlik və bağlantı layihələrini icra edə biləsiniz”.

Ölkə başçısı cənab İlham Əliyevin Qlobal Bakı Forumundakı çıxışında diqqətçəkən əsas məqamlardan biri də qlobal istiləşmə ilə bağlı oldu. Bu gün dünya ölkələrinin ən ciddi problem kimi qəbul etdikləri qlobal istiləşmə və bununla mübarizə məsələsində ölkəmizin rolu və bərpa edilə bilən enerji mənbələrindən istifadədə dünyaya öncüllük edən addımların atılması Azərbaycanın yeni dünya düzənindəki mərkəzi rolunu bir daha bəyan edir.

Bu gün artıq Azərbaycan böyük əhəmiyyət kəsb edən beynəlxalq tədbirlərin ölkəmizdə keçirilməsinə nail olmaqla yanaşı, qlobal miqyasda dünya dövlətlərinin bu günü və gələcəkdə qarşılaşa biləcəkləri məsələlər üzərində yeni perspektivləri irəli sürməklə güclü iradə ortaya qoyur. İndi əminliklə deyə bilərik ki, Azərbaycan regionun ən güclü ölkəsi kimi regional və qlobal miqyaslı lahiyələrin reallaşmasında müstəsna rol oynayır və bu rol da dünyada sülhün, əmin-amanlığın və rifahın yüksəlməsinə gətirib çıxarır. Əlbəttə, bu qeyd edilənlərin kökündə cənab İlham Əliyevin güclü iradəsi, uzaqgörən siyasəti və məsələlərə geniş rakusdan baxa bilməsi dayanır.

         Sevil HACIYEVA

Naxçıvan Muxtar Respublikası Ali Məclisinin deputatı

Nəşr edilib : 17.03.2025 15:01