NAXÇIVAN :

30 Dekabr 2024, Bazar ertəsi

“Türkiyədə Naxçıvanı təmsil etmək böyük bir qürurdur”

...

Naxçıvan şəhər 12 nömrəli tam orta məktəbin 4-cü sinif şagirdi Əsmənur Kərimli Türkiyə Respublikasının İstanbul şəhərində keçirilən 21 ölkədən 1254 məktəblinin qatıldığı “STEAM AHEAD-2024” olimpiadasının final mərhələsində iştirak edərək riyaziyyat fənni üzrə bürünc medala layiq görülüb. Biz də “STEAM AHEAD-2024” olimpiadasında ölkəmizi təmsil edən Əsmənur Kərimli ilə həmsöhbət olub qalibimizin təəssüratlarını öyrəndik: “9 yaşım var. Riyaziyyat fənninə olan marağım balaca vaxtlarımdan başlayıb. Babam riyyaziyat müəllimidir. O, ailəmlə birgə hər zaman mənə bu sahədə dəstək olub. Məktəbdə müəllimlərimin köməyi ilə  bu sahəyə olan marağım daha da artdı və müxtəlif olimpiadalara qatılaraq özümü sınamağa başladım. Uğurlu oldu. Belə ki, AMO (Amerikan Riyaziyyat Olimpiadası) olimpiadasında gümüş medala, SASMO (Sinqapur və Asiya Məktəblərinin Riyaziyyat Olimpiadası) olimpiadasında bürünc medala layiq görüldüm. Yarışlarda iştirakım riyyaziyat fənni üzrə özümü daha da inkişaf etdirməyimə imkan verir.  İstanbul şəhərində keçirilən “STEAM AHEAD-2024” olimpiadasında iştirak edərək final mərhələsində bürünc medala layiq görülməyim mənim üçün çox böyük nailiyyətdir və bu, gələcək yarışlarda yeni qələbələr qazanmaq üçün mənə motivasiya verdi.

Əsmənur onu da diqqətimizə çatdırdı ki, Türkiyədə Naxçıvanı təmsil etmək böyük bir qürurdur. Bu cür yarışda iştirak etmək və qalib olmaq ona çox böyük təcrübə qazandırır və gələcəkdə Azərbaycanı ən yaxşı şəkildə təmsil edəcəyinə inanır.

Biz də qalib məktəblini təbrik edir, gələcək fəaliyyətlərində uğurlar arzulayırıq.

Bülbül QULİYEVA

Nəşr edilib : 13.12.2024 10:01