Rəssam Şahin Rəsulzadənin “Dərin təəssürat” adlı sərgisi açılıb

"Şərq qapısı" xəbər verir ki, Naxçıvan Muxtar Respublikası Rəssamlar Birliyinin Bəhruz Kəngərli adına Sərgi Salonunda rəssamlar birliyinin üzvü, rəssam Şahin Rəsulzadənin “Dərin təəssürat” adlı növbəti fərdi yaradıcılıq sərgisi açılıb.

Naxçıvan Rəssamlar Birliyinin sədri, Əməkdar rəssam Ülviyyə Həmzəyeva tədbiri giriş sözü ilə açaraq rəssamın rənglər dünyasına baxışını kətana köçürərək sənətsevərlərə necə ustalıqla çatdırdığını qeyd edib.

Vurğulanıb ki, rəssam daim öz üzərində çalışaraq qədim Naxçıvanın hər fəsildə və maraqlı görüntülərini etüdləri ilə yaradıcı baxışdan təqdim edir. Onun bataliya, tarixi janrlarda yaratdığı əsərlər, məişət, portret və mənzərələri rəssamın hər tematikaya toxunduğu və cərəyan edən hadisələrə biganə qalmadığını, səsləşdiyini göstərir. İstedadlı rəssamın obrazlar qalareyasında rəssamları, tüccarları, xanları, döyüşçüləri görmək olar. Bu sərgi estetik zövqün inkişafında və günlük rutin işlərdən gözəllik aləminə səyatədir.
Sonra Əməkdar rəssamlar Telman Abdinov, Səyyad Bayramov, Həbibə Allahverdiyeva və digərləri rəssamın yaradıcılıq yolu haqqında söz açıb, ona uğurlar arzulayıblar.
Qeyd edək ki, fevralın 7-ə kimi davam edəcək “Dərin təəssürat” adlı sərgidə rəssamın 50-dən çox əsəri nümayiş olunur.

Aidə İBRAHİMOVA