NAXÇIVAN :

28 Aprel 2025, Bazar ertəsi

“Qədim ənənələr gələcəyə mirasdır” mövzusunda maarifləndirici tədbir keçirilib

...

4 aprel 2025-ci il tarixdə Naxçıvan şəhər 3 nömrəli tam orta məktəbdə dəyirmi masa ətrafında keçirilən tədbiri giriş sözü ilə açan Naxçıvan Şəhər İcra Hakimiyətinin əməkdaşı Orxan Məhərrəmov müvafiq istiqamətdə aparılan maarifləndirmə işinin əhəmiyyətindən bəhs edib.
Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin baş məsləhətçisi Müşərrəf Bağırova və Naxçıvan Şəhər Təhsil Şöbəsinin əməkdaşı Ceyran Məmmədova mövzu ətrafında çıxışlar etmişlər. Çıxışlar zamanı bildirilib ki, milli adət-ənənələr xalqımızın milli sərvətidir və xalqın irsinin, milli mənəviyyatının təzahürüdür. Min illər boyu formalaşan və Azərbaycan xalqının yüksək mənəvi dəyərlərə malik olduğunu göstərən təkraredilməz adət və ənənələr millətimizin keçmişi ilə bu günü və gələcəyi arasında sarsılmaz bir mənəvi körpü rolunu oynamaqdadır. Milli xüsusiyyətlərin yad təsirlərə məruz qaldığı qloballaşma əsrində uşaqların milli dəyərlər əsasında düzgün tərbiyə olunması və sağlam mühitdə yetişməsi əhəmiyyətli məsələdir. Xüsusilə də uşaq, yeniyetmə və gənclərin tərbiyəsində, mənəvi aləmlərinin zənginləşməsində milli ideologiyamızın təbliğ və təşviq edilməsi önəmli rola malikdir.
Diskussiya formatında keçən tədbirdə şagirdləri maraqlandıran suallar cavablandırılıb, tədbirdən  31 nəfər yararlanıb.

Nəşr edilib : 04.04.2025 23:51