Milli Müdafiə Universitetinin tabeliyində fəaliyyət göstərən Naxçıvan Hərbi Kollecində “Mübarizlər məktəbi” filminin təqdimatına həsr olunmuş tədbir keçirilib

"Şərq qapısı" xəbər verir ki, tədbirə başlamazdan öncə Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilərək Dövlət Himni səsləndirilib.
“Müdafiə Nazirliyinin strukturuna daxil olan Milli Müdafiə Universitetinin tabeliyindəki Xüsusi təyinatlı hərbi təhsil müəssisələrinin yaradılması haqqında” Prezident cənab İlham Əliyevin Fərmanı və müdafiə naziri, general-polkovnik Zakir Həsənovun əmri diqqətə çatdırılıb.
Kursantlar “Millətim” mahnısını ifa ediblər. Naxçıvan Televiziyasının Naxçıvan Hərbi Kolleci haqqında ərsəyə gətirdiyi “Mübarizlər məktəbi” filmi təqdim olunub.
Təqdimatdan sonra Milli Müdafiə Universitetinin rektorunun elm üzrə müavini, general-mayor Arif Həsənov tədbir iştirakçılarını salamlayaraq Naxçıvan Hərbi Kollecinin yaranmasında əməyi olan hər kəsə minnətdarlığını bildirib.
Qeyd olunub ki, “Mübarizlər məktəbi” filmi böyük ürəklə hazırlanıb və hərbi, eləcə də pedaqoji yanaşma var.
“Naxçıvan Muxtar Respublikası Televiziya və Radio Verilişləri” Qapalı Səhmdar Cəmiyyətinin sədri Sahil Tahirli çıxış edərək Naxçıvan Hərbi Kollecinin yaradılması və fəaliyyətə başlanması münasibətilə təbriklərini çatdırıb. Qeyd olunub ki, Prezident cənab İlham Əliyevin ən böyük əsəri müstəqil, suveren Azərbaycandır. İşğaldan azad olunan və müasir mərhələdə çox sürətlə yenidən qurulan, tikilən və bərpa olunan bizim Şərqi Zəngəzur torpaqlarımız, doğma Qarabağımızdır. Bu əsərlərin içərisində yaratdığı həm də elm-təhsil müəssisələri də xüsusi yer tutur. Yaradıcı heyət olaraq bu cür filmlərin ərsəyə gətirilməsindən qürur duyuruq.
Naxçıvan Hərbi Kollecinin kursantları tərəfindən “Şərq qapısı” qəzetinin dəstəyi ilə hazırlanan “Zəfər Günü”nün 4-cü il dönümünə həsr olunmuş “Dəmir yumruq” və “Xarıbülbül” simvollarını əks etdirən fləş-mob nümayiş olunub.
Sonra "Kapital Bank"ın Kooperativ satışlar departamentinin Naxçıvan üzrə meneceri Murad Sevdimalıyev çıxış edərək Naxçıvan Hərbi Kollecinə döş nişanlarını təqdim edib.
Tədbirin yekununda isə “Naxçıvan Muxtar Respublikası Televiziya və Radio Verilişləri” Qapalı Səhmdar Cəmiyyətinin sədri Sahil Tahirli və “Şərq qapısı” qəzetinin baş redaktoru Sara Əzimovaya Milli Müdafiə Universitetinin tabeliyində fəaliyyət göstərən Naxçıvan Hərbi Kollecində təşkil edilən tədbirlərə göstərdikləri informasiya dəstəyi üçün Milli Müdafiə Universitetinin rektoru general-mayor Gündüz Əbilovun təşəkkürü çatdırılmış və general-mayor Arif Həsənov tərəfindən “Təşəkkürnamə”lər təqdim olunmuşdur.
Sonda xatirə şəkli çəkdirilib.

Aidə İBRAHİMOVA