NAXÇIVAN :

16 Oktyabr 2024, Çərşənbə

İpoteka kreditlərinin məbləğlərində dəyişiklik edilərək maksimal səviyyəyə çatdırılmışdır

...

Naxçıvan Muxtar Respublikası Nazirlər Kabinetinin mətbuat xidmətindən “Şərq qapısı”na verilən məlumata görə, ölkəmizdə, eləcə də onun ayrılmaz tərkib hissəsi olan muxtar respublikada gənc ailələrin mənzilə olan tələbinin təmin olunması, rifahının yaxşılaşdırılması  məsələsi prioritet vəzifə kimi müəyyən edilib. Bu istiqamətdə ardıcıl tədbirlər görülür. 
Bu günlərdə Naxçıvan Muxtar Respublikası Nazirlər Kabinetində müşavirə keçirilib. Müşavirədə “Naxçıvan İpoteka Fondu” Açıq Səhmdar Cəmiyyətinə bir sıra tapşırıqlar verilərək gənc ailələrin mənzil-məişət şəraitinin yaxşılaşdırılması ilə əlaqədar adi ipoteka və güzəştli ipoteka kreditlərinin məbləğlərində dəyişiklik edilməsi, məbləğlərin ölkə səviyyəsinə uyğunlaşdırılması müəyyən edilmişdir.
Məlumat üçün qeyd edək ki, bununla əlaqədar olaraq “Naxçıvan İpoteka Fondu” Açıq Səhmdar Cəmiyyəti artıq oktyabrın 1-dən etibarən Naxçıvan Muxtar Respublikasında əhalinin ipoteka kreditlərinə əlçatanlığının artırılması məqsədilə ipoteka kreditlərinin, o cümlədən güzəştli ipoteka kreditinin maksimal məbləğini artıraraq 8%-li ipoteka krediti 150 min manata, 4%-li ipoteka krediti isə 100 min manata çatdırılmışdır.
Gənc ailələr İpoteka Fondunun müvəkkil bankları ilə əlaqə saxlayıb maksimal məbləğdə ipoteka kreditlərindən yararlana biləcəklər. Qeyd edək ki, kreditlərin ayrılması üçün “Naxçıvan İpoteka Fondu” Açıq Səhmdar Cəmiyyətinə tələb olunan qədər vəsait ayrılmışdır.

Nəşr edilib : 03.10.2024 19:16