NAXÇIVAN :

05 Aprel 2025, Şənbə

Dövlət başçısının “Euronews” televiziyasına müsahibəsində qlobal məsələlər milli maraqlar müstəvisindən

...

XII Qlobal Bakı Forumunda dövlət başçısı İlham Əliyev ölkəmizin mövqeyini ifadə etməklə dünyanın diqqətini Bakıya yönəltdi. Cənab Prezident enerji siyasətimizə toxunmaqla yanaşı, bir sıra mühüm məsələlərə aydınlıq gətirdi. Belə bir yüksək səviyyəli əməkdaşlıq forumunda dövlət başçısının “Euronews” televiziyasına verdiyi müsahibə beynəlxalq məsələlərə yanaşmada keçirilən forumun bir daha vacib əhəmiyyətindən xəbər verir. 50-dən artıq dövlətin fəaliyyətdə olan, eyni zamanda sabiq dövlət və hökumət başçılarının iştirak etdiyi bu beynəlxalq əhəmiyyətli tədbir müxtəlif fikirlərin kombinasiyası, eləcə də bir sıra məsələlərdə fikir ayrılığı, hətta polemika baxımından yüksək əhəmiyyət kəsb edir.

Cənab Prezident verdiyi müsahibədə günümüzün prioritetlərinə toxunaraq müasir dövrdə ölkəmizin dünya dövlətləri içərisində olan nüfuzunu bir daha vurğulayaraq öz ərazi bütövlüyünü, suverenliyini təmin edən Azərbaycanın beynəlxalq aləmdə sülhün təmin edilməsində atdığı addımların önəmini diqqətə çatdırdı. Dövlət başçısı bildirdi ki, beynəlxalq hüququn selektiv tətbiqinin qurbanı olan Azərbaycanın gələcəyini daxili resurslar hesabına qurması baxımından böyük təcrübəsi var. “Ölkəmizin ərazi bütövlüyü məhz özümüz tərəfindən bərpa edilmişdir və indi də gələcəyimizi özümüz qururuq”, – deyən dövlət başçımız İkinci Qarabağ müharibəsinin bitməsindən 5 il keçməsinə baxmayaraq, Ermənistanla sülh müqaviləsinin olmamasını, sülh sazişi imzalanana qədər isə burada sabitlik olmayacağını öz müsahibəsində diqqətə çatdırdı.

Prezident İlham Əliyev, eyni zamanda ABŞ-Azərbaycan münasibətlərinə də toxunaraq ABŞ-nin əvvəlki administrasiyası və Azərbaycan arasında əlaqələrin pisləşməsindən məyusluq hissi keçirdiyini bildirərək milli maraqlarmıza keçmiş rəhbərliyin ədalətsiz yanaşmasını vurğuluyaraq Tramp administrasiyası dövründə ABŞ ilə münasibətlərimizin və güclü tərəfdaşlığımızın yenidən qurulmasına nikbin baxdığını bəyan etdi. “Euronews” televiziyasına verdiyi müsahibədə beynəlxalq ictimaiyyət tərəfindən istifadə olunacaq qarşılıqlı əlaqə konfiqurasiyasının heç kəsə bəlli olmadığı bir zamanda dünya ölkələrinin özünün  daxili işlərinə və daxili imkanlarına daha çox diqqət yetirməyi tövsiyə edən dövlət başçısı cənab İlham Əliyev yeni dünya düzənində yeni qaydaların müəyyənləşdirilməsi prosesinin labüdlüyünü vurğulamışdır.

Bütün dünya ilə normal münasibətlər quraraq Azərbaycanın milli maraqlarını tam təmin edən Prezident İlham Əliyev ölkəmizdə bu qəbildən beynəlxalq əhəmiyyətli tədbirlərin keçirilməsinin böyük təşəbbüskarıdır. Öz siyasi xətti, qətiyyəti, diplomatiyası ilə inkişafın, sabitliyin, təhlükəsiz həyatımızın təminatçısı olan Azərbaycan lideri hər zaman ümumxalq sevgisinin mənbəyi olub.

                                                      Xumar Məmmədova

                                      Naxçıvan Muxtar Respublikası Ali Məclisinin deputatı

Nəşr edilib : 18.03.2025 10:31