NAXÇIVAN :

17 Oktyabr 2024, Cümə axşamı

Culfanın Bənəniyar və Əbrəqunus kəndlərinin içməli su ehtiyacı tam təmin olunacaq

...

Muxtar respublikada əhalinin içməli və suvarma su təminatının yaxşılaşdırılması diqqət mərkəzində saxlanılır. Bu məqsədlə Naxçıvan Muxtar Respublikası Dövlət Su Ehtiyatları Agentliyi tərəfindən bir sıra layihələr həyata keçirilir.
Agentliyin mətbuat xidmətindən “Şərq qapısı”na bildirilib  ki, Culfa Su Meliorasiya Sistemlərinin İstismarı İdarəsi tərəfindən rayonun Bənəniyar və Əbrəqunus kəndlərində cari ilin iyul ayından başlayaraq bir sıra işlər görülür. Belə ki, Bənəniyar kəndində diametri 355 millimetr olan plastik borularla 3400 metr uzunluğunda suvarma boru xətti çəkilib. Bənəniyar Su Anbarından nasoslar vasitəsilə xəttə vurulan suvarma suyu vasitəsilə kəndin həyətyanı torpaq sahələrinin suvarılması təmin olunub. Bundan əlavə, kəndin içməli su xətlərində təmir-bərpa və yenilənmə işləri aparılıb. Görülən işlər çərçivəsində istismar müddətini başa vurmuş içməli su təyinatlı 500 metr uzunluğunda olan boru xətti diametri 90 millimetr olan plastik borularla əvəz edilib. Bununla yanaşı, ümumi uzunluğu 1200 metr olan yeni içməli su xətti çəkilərək 3 ədəd yeni subölüşdürücüyə quraşdırılıb, həmçinin 1 ədəd fəaliyyəti dayanmış subartezian quyusunun yenidən bərpası nəticəsində 30 ev içməli su ilə təmin edilib. 
Hazırda idarə tərəfindən kənddə yeni qazılan subartezian quyusundan kəndin bir məhəlləsini içməli su ilə təchiz edəcək diametri 90 millimetr, uzunluğu 1050 metr olacaq boru xəttinin tikinti-quraşdırma  işlərinə başlanılıb. Boru xətti 2 yeni subölüşdürücüyə quraşdırılaraq əhalinin istifadəsinə veriləcək. Bunun nəticəsində 34 evin içməli su ehtiyacı təmin olunacaq. 
Culfa rayonunun Əbrəqunus kəndində də su təminatı sahəsində analoji işlər görülüb, 1850 metr uzunluğunda öz axınlı suvarma boru xətti çəkilərək vətəndaşların istifadəsinə verilib. İçməli su təminatının yaxşılaşdırılması məqsədilə yeni boru xətləri çəkilib və mövcud xətlərdə təmir-bərpa işləri yerinə yetirilib. Belə ki, korroziyaya uğramış 600 metr uzunluğunda olan dəmir borular 90 millimetrlik plastik borularla əvəz edilib. Kənddə yerləşən 80-ə yaxın evin içməli su təminatı üçün hazırda yeni qazılmış subartezian quyusundan 750 metr məsafədə yeni içməli su xətti çəkilir. 
Nəzərdə tutulmuş tikinti-quraşdırma işləri yekunlaşdıqdan sonra sözügedən hər iki kənddə əhalinin dayanıqlı və keyfiyyətli içməli su ehtiyacı tam təmin edilmiş olacaq.
Nəşr edilib : 17.10.2024 14:39