NAXÇIVAN :

31 Yanvar 2025, Cümə

Akademik Yusif Məmmədəliyevin Ev Muzeyinin yaradılmasından 50 il ötür

...

Ordubad şəhərində yerləşən Akademik Yusif Məmmədəliyevin Ev Muzeyinin yaradılmasının 50 illiyi ilə bağlı tədbir keçirilib. 
Tədbiri giriş sözü ilə Naxçıvan Muxtar Respublikasının Mədəniyyət Nazirliyinin Mədəniyyət, mədəni irs, incəsənət və təhsil müəssisələri ilə iş şöbəsinin müdiri Pərvin Həsənov açaraq qeyd edib ki, Yusif Məmmədəliyevin ev muzeyi 1975-ci ildə  Ümummilli Lider Heydər Əliyevin təşəbbüsü ilə, alimin qazandığı misilsiz elmi naliyyətlərinin uğuru nəticəsində 70 illiyi münasibətilə  yaradılmışdır.
Bu gün Yusif Məmmədəliyevin Ev Muzeyinin yaradılmasının 50 illik yubileyinin keçirilməsi xalqımızın öz tarixinə, Azərbaycan elminə hörmətinin göstəricisidir, çünki bu  şəxsiyyət elmimizin simvolu hesab oluna bilər.
Daha sonra  Ordubad Rayon Mədəniyyət İdarəsinin müdiri Azər Məmmədov  çıxış edərək vurğulayıb ki, xalqımız Yusif Məmmədəliyev kimi elm xadimləri ilə tanınır və fəxr edir.
Tədbirdə çıxış edən Akademik Yusif  Məmmədəliyevin Ev Muzeyinin direktoru Elvira İbrahimova diqqətə çatdırıb ki, Yusif Məmmədəliyevin alimliyi həm geniş nəzəri xarakter, eyni zamanda daha çox əməli, tətbiqi xarakter daşıyır. O, nəzəriyyəni təcrübə ilə birləşdirən, onu tətbiq edə bilən və əməli nəticə götürən, cəmiyyətə, ölkəyə, xalqa konkret fayda gətirən alim olmuşdur. 
Görkəmli alim heç vaxt unudulmayacaq, Azərbaycan xalqının tarixindəki yeri daim görünəcək.
Tədbirin sonunda muzeyin ekspozisiyasına baxış keçirilib.

Nəşr edilib : 29.01.2025 11:28