“Ümummilli Lider Heydər Əliyev müstəqil Azərbaycan Konstitusiyasının müəllifidir” mövzusunda konfrans keçirilib

Naxçıvan Muxtar Respublikası Prokurorluğu və Naxçıvan Muxtar Respublikası Mədəniyyət Nazirliyinin birgə təşkilatçılığı ilə “Konstitusiya və Suverenlik İli”nə həsr olunmuş “Ümummilli Lider Heydər Əliyev müstəqil Azərbaycan Konstitusiyasının müəllifidir” mövzusunda konfrans keçirilib.

Tədbirdən əvvəl Ümummilli Lider Heydər Əliyevin Əcəmi seyrəngahındakı büstü ziyarət edilib.

Konfransı giriş sözü ilə Naxçıvan Muxtar Respublikası mədəniyyət nazirinin müavini, nazir vəzifələrini müvəqqəti icra edən Həsən Seyidov qeyd edib ki, 1995-ci il iyunun 5-də Ümummilli Lider Heydər Əliyevin sədrliyi ilə Konstitusiya Komissiyası yaradıldı. Bu ali sənədin müasir dəyərləri özündə ehtiva edən mükəmməl formada qəbul olunmasını reallaşdırmaq üçün Ulu Öndər layihənin hazırlanması zamanı onun hər bir müddəasını şəxsən nəzərdən keçirmiş, dövlətin gələcək taleyi, demokratik imici baxımından bu işə son dərəcə həssaslıqla yanaşmışdı.
Naxçıvan Muxtar Respublikası Prokurorluğunun şöbə rəisi, Baş ədliyyə müşaviri Faiq Səfərov çıxışında bildirib ki, Heydər Əliyevin uzunmüddətli gərgin əməyinin məhsulu olan Konstitusiya öz demokratikliyi, humanistliyi ilə seçilərək ölkəmizdə vətəndaşların hüquq və azadlıqlarının təmin edilməsi və müstəqil dövlətçiliyimizin tərəqqisi üçün hərtərəfli zəmin yaratdı.
Sonra YAP Naxçıvan şəhər təşkilatının sədri, tarix üzrə fəlsəfə doktoru, dosent Elman Cəfərli, Naxçıvan Muxtar Respublikasının İnsan Hüquqları üzrə Müvəkkili (Ombudsman) Aparatının Ümumi şöbəsinin müdiri vəzifəsini icra edən Sadiq Babayev, Naxçıvan Dövlət Universitetinin Tarix-filologiya fakültəsinin dekan müavini, tarix üzrə fəlsəfə doktoru Qadir Əkbərov çıxışlarında vurğulayıblar ki, Ulu Öndərin bilavasitə rəhbərliyi ilə hazırlanmış və 1995-ci il noyabrın 12-də qəbul olunmuş Azərbaycan Respublikasının ilk Konstitusiyası ölkəmizdə genişmiqyaslı qanunvericilik və institusional islahatların əsasını təşkil edib.
Konfransın bədii hissəsində Naxçıvan Dövlət Filarmoniyasının Estrada Orkestrinin müşayiətilə Azərbaycan Respublikasının Əməkdar artistləri – Gülyanaq Fərzəliyeva, Mübariz Əsgərov, Naxçıvan Muxtar Respublikasının Əməkdar artisti Ruhiyyə Hüseynova, Emin Hüseynov, İlkin Abdullayev, Əfsanə Babayevanın ifalarında “Vətən savaşı”, “Daha məndə dözüm yox”, “Ey vətən”, “Qaytar eşqimi” və digər musiqi nömrələri təqdim olunub.
Konsert proqramı izləyicilər tərəfindən alqışlarla qarşılanıb.