NAXÇIVAN :

23 Noyabr 2024, Şənbə

Türkiyəli parlamentari: Azərbaycan nümayəndə heyətinin AŞPA-ya qayıtmasına, çoxtərəfli dialoqu bərpa etməyə çalışmalıyıq

...

Avropa Şurası Parlament Assambleyası iki əsas risklə üz-üzədir. Bunlardan birincisi özünü kontinentallıqla məhdudlaşdırmaq, ikincisi isə onun üzv dövlətləri arasında bərabər münasibətə hörmət etməməkdir. Avropa Şurasının təsis Nizamnaməsində nəzərdə tutulduğu kimi, bu təsisat üzvlər arasında daha sıx birlik əldə etmək məqsədilə yaradılıb.

Bu fikirləri türkiyəli parlamentari Zeynep Yıldız AŞPA-nın payız sessiyası çərçivəsində keçirilən cari debatlarda çıxışı zamanı söyləyib.

“Qarabağ Ermənistan işğalı altında olanda burada Qarabağın Azərbaycanın beynəlxalq səviyyədə tanınmış ərazisinin tərkib hissəsi olduğunu bəyan edən çoxsaylı çıxışlar edilirdi. Nə üçün bu gün Avropa Şurasının üzv dövləti Azərbaycan ərazi bütövlüyünü bərpa etdikdən və məcburi köçkünlərini 30 ildən sonra doğma yurdlarına qaytarmaqla bağlı tədbirlər gördüləndə eyni mövqedən çıxışlar olmur? Qəbul etməliyik ki, yanaşmada fərqlilik var”, - deyən Z. Yıldız bildirib ki, üzv dövlətlərə ikili standartlarla yanaşmaq AŞPA-nın nüfuzunu azaldır və onu bir daha kontinental çərçivədə məhdudlaşdırır. Parlamentari vurğulayıb ki, Azərbaycan nümayəndə heyətinin səlahiyyətləri təsdiqlənərək onun AŞPA-ya qayıtması müzakirə olunmalıdır. Azərbaycan nümayəndə heyəti olmadan bu ölkəyə qarşı müxtəlif fikirlər səsləndirilir ki, bu da dialoq prinsipinin pozulmasıdır və bu, ədalətli deyil.

“Bu vəziyyət onu göstərir ki, biz qurumumuzun təməlini təşkil edən rasional yanaşmalardan uzaqlaşırıq. Azərbaycan nümayəndə heyətinin üzvlərinin burada olmadıqları, fikirlərini bölüşə bilmədkləri vaxtda burada Azərbaycanla bağlı məsələlərin müzakirəsi üzv dövlətlərin demokratik səviyyəsinin yüksəlməsinə töhfə verməyəcək.

Azərbaycan nümayəndə heyətinin olmadığı bu zalda bu ölkəyə qarşı mənfi fikirlər söyləməkdənsə, onun Avropa Şurası Parlament Assambleyasına qayıtmasına, demokratik və çoxtərəfli dialoq vasitəsini bərpa etməyə çalışmalıyıq”, - deyə türkiyəli parlamentari bildirib. Qeyd edilib ki, Avropa Şurası Parlament Assambleyasının münaqişələr yaratmaq deyil, onları həll etmək funksiyası var və Azərbaycanı sıxışdırmaq əvəzinə, AŞPA-nın plüralist tərkibini qoruyub saxlamaq zəruridir.

Nəşr edilib : 02.10.2024 14:55