NAXÇIVAN :

22 Noyabr 2024, Cümə

Növbəti dəfə erkən nikaha cəhdin qarşısı alınıb

...

Erkən nikahın qarşısının alınması böyük bir uğurdur. Çünki, bu addım uşaqların hüquqlarını, sağlamlığını və gələcəyini qorumağa yönəlib. Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsi tərəfindən erkən nikahla mübarizə istiqamətində maarifləndirmə işləri aparılır, erkən nikahın fəsadları və qarşısının alınmasında normativ hüquqi tənzimlənmə barədə ictimaiyyətə ətraflı məlumat verilir. 
Bütün bunlara baxmayaraq hələ də övladını erkən yaşda evləndirməyə çalışan bəzi valideynlərə rast gəlinir. Təkcə bu ilin 9 ayı ərzində 4-ü Şərur, 1-i Kəngərli və 1-i də Babək rayonunda olmaqla, ümumilikdə 6 erkən nikahın qarşısı alınıb. Sonuncu dəfə də Şərur rayonunda erkən nikaha cəhd edilib. Belə ki, Şərur rayon Yuxarı Aralıq kənd sakini 2 avqust 2007-ci il təvəllüdlü, yetkinlik yaşına çatmayan N.T-nin (ad və soyad şərtidir) 25 aprel 1996-cı il təvəllüdlü Şərur rayon İbadulla kənd sakini F.N. (ad və soyad şərtidir) ilə 2024-cü il 11-13 oktyabr tarixlərində toy mərasimlərinin keçiriləcəyi məlumatı əldə edilib. Həmin məlumat əsasında 2024-cü il 7 oktyabr tarixində Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin əməkdaşlarının, Şərur Rayon İcra Hakimiyyəti yanında Yetkinlik Yaşına Çatmayanların İşləri və Hüquqlarının Müdafiəsi üzrə Komissiyanın və gender zorakılığı və uşaqlara qarşı zorakılıq üzrə monitorinq qrupunun üzvlərinin iştirakı ilə məsələ yerindəcə araşdırılıb və tərəflərin valideynləri ilə qanunamüvafiq söhbət aparılaraq uşaq hüquqlarını pozan bu halların qanunvericiliyin tələblərinə zidd olduğu diqqətə çatdırılıb. Beləliklə də aid təşkilatların nümayəndələrinin səyi nəticəsində erkən nikahın qarşısı alınıb. 
Bildirilir ki, uşaq hüquqlarının müdafiəsi sahəsində fəaliyyət göstərən dövlət orqanları tərəfindən erkən nikah hallarının qarşısı gələcəkdə də qətiyyətlə alınacaq. 
Vətəndaşlardan bu cür hadisələrə qarşı diqqətli olmağı, belə hallarla rastlaşdıqda dərhal Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinə məlumat vermələri xahiş olunur.
Nəşr edilib : 17.10.2024 15:08