Naxçıvanda un məmulatları istehsalı sexində ciddi nöqsanlar aşkarlanıb

Naxçıvan Muxtar Respublikası Qida Təhlükəsizliyi Agentliyinin əməkdaşları tərəfindən aparılan dövlət nəzarəti tədbirləri zamanı Naxçıvan şəhəri Ə.Əliyev küçəsində yerləşən “Bolmart” supermarketində fəaliyyət göstərən un məmulatları istehsalı sexində ciddi nöqsanlar aşkarlanıb.
"Şərq qapısı" xəbər verir ki, baxış zamanı müəssisənin qida təhlükəsizliyi sahəsində mövcud texniki normativ hüquqi aktların tələblərinə cavab vermədiyi müəyyən edilib. Belə ki, gigiyena qaydalarına əməl olunmadığı, çirklənməyə qarşı müdafiə tətbirlərinin tətbiq edilmədiyi, zərərvericilərlə mübarizə üçün şərait yaradılmadığı, tavan, döşəmə və divarların yararsız vəziyyətdə olduğu, məhsulların etiketlənmədiyi aşkarlanıb. Eyni zamanda, müəssisənin qida təhlükəsizliyi qeydiyyatına alınmadığı, istifadə olunan alət və avadanlıqların vaxtında təmizlənmədiyi, həmçinin obyektdə dezinfeksiya, dezinseksiya və deratizasiya işlərinin də aparılmadığı məlum olub. Aşkarlanmış nöqsanlarla bağlı müvafiq tədbirlər görülüb, müəssisənin fəaliyyəti 23.10.2024-cü il tarixdən dayandırılıb. Əhalinin sağlamlığının qorunması və təhlükəsiz qida məhsulları ilə təmin olunması istiqamətində ardıcıl tədbirlər bundan sonra da davam etdiriləcəkdir.