NAXÇIVAN :

26 Mart 2025, Çərşənbə

Naxçıvanda “Sağlam məhəllə” layihəsi reallaşdırılacaq

...

Azərbaycan Respublikası Gənclər və İdman Nazirliyinin “Sağlam məhəllə” layihəsinin muxtar respublikanın Babək, Culfa və Şahbuz şəhərlərində həyata keçirilməsi nəzərdə tutulur. Bütün bu işlər nəticəsində il sonuna kimi muxtar respublikanın bütün bölgələri daxil olmaqla, əhalinin ödənişsiz istifadəsinə veriləcək idman meydançalarının ümumi sayı 22-ə yüksələcək. Hazırda mövcud say 8-dir.

"Şərq qapısı" xəbər verir ki, bu sözləri Naxcıvan Muxtar Respublikası gənclər və idman nazirinin müavini, nazir vəzifəsinə müvəqqəti icra edən Məcid Seyidov 2024-cü ilin yekunları və qarşıda duran vəzifələrə dair mətbuat konfransında deyib.

Nazir müavini qeyd edib ki, muxtar respublikanın idman infrastrukturunun gücləndirilməsi ilə bağlı paralel
addımlar da atılmaqdadır. Kəngərli rayonunun Qıvraq qəsəbəsində yerləşən minifutbol meydançasında özəl investisiya cəlbi yolu ilə yenidənqurma işləri həyata keçirilmiş və ötən ilin noyabrında əhalinin istifadəsinə verilib. Sahibkarın bu məsələdəki mövqeyi Gənclər və İdman Nazirliyi tərəfindən rayonda keçirilən vətəndaş qəbulu zamanı məlum olmuş, ardınca təşkilati-hüquqi proseslər başladılaraq həmin şəxsə dövlət dəstəyi göstərilib.

"Stimulverici hadisənin davamı olaraq Culfa rayon mərkəzində özəl investisiya hesabına universal qapalı idman obyektinin inşası üçün ilkin işlərə başlanılıb. Həmçinin Dövlət İnvestisiya Proqramına daxil edilməsi təklif olunan Babək, Şahbuz və Ordubad
rayonlarında idman obyektlərinin tikilməsi barədə əsaslandırılmış layihələr aidiyyəti quruma göndərilib"-deyə Məcid Seyidov əlavə edib.

Nəşr edilib : 05.03.2025 13:17