NAXÇIVAN :

17 Oktyabr 2024, Cümə axşamı

Naxçıvanda məktəb direktoru vəzifəsi üçün keçirilən müsahibənin nəticələri elan olunub

...

Naxçıvan Muxtar Respublikası Təhsil Nazirliyi tərəfindən oktyabrın 15-16-da Naxçıvanda ilk dəfə olaraq şagird sayı 150-dək olan təhsil müəssisələrində  vakant direktor vəzifəsi üçün  keçirilən müsahibə mərhələsinin nəticələri elan olunub.  

Nazirliyin mətbuat xidmətindən "Şərq qapısı"na bildirilib ki, müsahibənin  avqustun 21-28-də aparılan sənəd qəbulu mərhələsində  13 vakant vəzifə üçün 48 namizəd sənəd verib. Müsahibə mərhələsi videoçəkiliş təmin edilməklə  həyata keçirilib, sənəd verən 48 namizəddən 43-ü bu mərhələdə iştirak edib.

Müsahibə zamanı namizədlərin vəzifə bilikləri, peşəkar kompetensiyaları, psixoloji hazırlığı və dünyagörüşü müvafiq meyarlar əsasında 5 ballıq sistemlə qiymətləndirilib, 7 ümumtəhsil müəssisəsi üzrə yekun orta balı 3 və daha yüksək olan 8 namizəd keçid balını toplamış hesab olunub. Müsahibə mərhələsinin nəticəsinə əsasən keçid balını toplamış bir neçə namizəddən  ən yüksək nəticə göstərmiş namizədin müvafiq vəzifəyə təyin olunması nəzərdə tutulub.

Namizədlər müsahibə mərhələsi ilə bağlı yeddi iş günü ərzində Naxçıvan Muxtar Respublikası Təhsil Nazirliyinə apellyasiya şikayəti verə bilərlər. 

Müsahibə mərhələsinin nəticələri ilə bağlı məlumat  https://shorturl.at/aUb7H linkində yerləşdirilib.
Nəşr edilib : 17.10.2024 18:07