NAXÇIVAN :

18 Aprel 2026, Şənbə

Naxçıvanda bu ilin 9 ayında 51 qeyri-yaşayış təyinatlı obyektə dair mülkiyyət hüququnu təsdiq edən sənəd verilib

...

Kəngərli rayonunda Naxçıvan Muxtar Respublikası İqtisadiyyat Nazirliyi yanında Əmlak Məsələləri Dövlət Xidmətinin, Fövqəladə Hallar Nazirliyinin, Dövlət Şəhərsalma və Arxitektura Komitəsinin və Kəngərli Rayon İcra Hakimiyyətinin birgə təşkilatçılığı ilə sahibkarlarla maarifləndirici görüş keçirilib. 

Əmlak Məsələləri Dövlət Xidmətindən "Şərq qapısı"na bildirilib ki, tədbiri giriş sözü ilə rayon İcra Hakimiyyətinin şöbə müdiri Ziya Əliyev açıb.  

Tədbirdə çıxış edən Əmlak Məsələləri Dövlət Xidmətinin sektor müdiri Taleh Quliyev ölkə başçısının “Qeyri-yaşayış təyinatlı bəzi tikinti obyektlərinin istismarına icazə verilməsi ilə bağlı əlavə tədbirlər haqqında” 14 iyun 2023-cü il tarixli Fərmanının icrası istiqamətində muxtar respublikada həyata keçirilən tədbirlərdən danışıb.

Bildirilib ki, Fərmana uyğun olaraq xidmət tərəfindən muxtar respublikada müraciət əsasında istismarına icazə verilmiş obyektlərə mülkiyyət sənədlərinin verilməsi davam etdirilir. Cari ilin 9 ayı ərzində, ümumilikdə, 51 qeyri-yaşayış təyinatlı obyektə dair mülkiyyət hüququnu təsdiq edən sənəd verilib.

 Diqqətə çatdırılıb ki, tikinti obyektlərinin istismarına sadələşdirilmiş qaydada icazə verilməsi üçün müraciət müddəti 2026-cı il yanvarın 1-də başa çatır. Sahibkarlıq subyektləri mülkiyyət hüquqlarının qeydiyyata alınması prosesinə başlamaq üçün müəyyən edilmiş müddət ərzində aidiyyəti üzrə müraciət etməlidirlər.

Fövqəladə Hallar Nazirliyinin Dövlət Tikintidə Təhlükəsizliyə Nəzarəti İdarəsinin əməkdaşı Həbib Kərimov sahibkarlar tərəfindən müraciət edilməsi qaydasını və istismara icazə verilməsi prosesinin mərhələlərini iştirakçılara ətraflı izah edib. 

Vurğulanıb ki, 2023-cü il iyun ayının 1-dək tikintisi tamamlanıb, tikintiyə müvafiq icazə sənədləri olmayan obyekt sahibləri həmin obyektin istismarına icazə almaq üçün nazirliyə müraciət etməlidir. Nazirlik sifarişçinin etdiyi müraciəti və ona əlavə olunmuş sənədləri elektron qaydada xidmətə göndərir.
Xidmət müraciətin daxil olduğu tarixdən 15 iş günü müddətində yerquruluşu planı hazırlayaraq elektron qaydada nazirliyə, Dövlət Şəhərsalma və Arxitektura Komitəsinə və sifarişçiyə təqdim edir. Sifarişçi Fövqəladə Hallar Nazirliyinə tikinti layihəsinin memarlıq planlaşdırma bölməsini və digər sənədləri təqdim edir. Nazirlik isə müraciətə baxaraq müsbət rəy verdiyi layihəni xidmətin təqdim etdiyi planla birlikdə elektron qaydada komitəyə və ya aidiyyəti yerli icra hakimiyyəti orqanına göndərir.

Dövlət Şəhərsalma və Arxitektura Komitəsinin əməkdaşı Tural Rüstəmli bildirib ki, komitə və ya aidiyyəti yerli icra hakimiyyəti orqanı 5 iş günü müddətində aparılmış müayinənin nəticələrinə əsasən tikinti obyektinin istismarına icazə verir və bu barədə məlumatı tikintilərin dövlət reyestrinə daxil edilməsi üçün göndərir. Müvafiq sənədlər əsasında qeyri-yaşayış obyekti üzərində hüquqlar dövlət qeydiyyatına alınır və beləliklə, hüquq sahibinə çıxarış verilir.

Tədbirdə mövzu ilə bağlı fikir mübadiləsi aparılıb, sahibkarların suallarına aydınlıq gətirilib.

Qeyd edək ki, muxtar respublikanın bir sıra rayonlarında sahibkarlarla belə maarifləndirici görüşlərin təşkili nəzərdə tutulur.

Nəşr edilib : 14.10.2025 16:16