Oktyabrın 25-də Ordubad Rayon İcra Hakimiyyətinin təşkilatçılığı ilə COP29-a həsr olunmuş "Yaşıl innovasiyalar və ətraf mühitin qorunması" mövzusunda konfrans keçirilib.

Ordubad Rayon İcra Hakimiyyətinin inzibati binasının akt zalında keçirilən tədbirdə rayon İcra Hakimiyyətinin başçısı Rəcəb Rəhimli, İcra Hakimiyyətinin əməkdaşları, hüquq-mühafizə orqanlarının, idarə, müəssisə və təşkilatların rəhbər şəxsləri, icra nümayəndələri, bələdiyyə sədrləri və rayon ziyalıları iştirak ediblər. Konfransda, həmçinin canlı bağlantı vasitəsilə Naxçıvan Muxtar Respublikasının ədliyyə naziri vəzifələrini müvəqqəti icra edən, nazir müavini  Hüseyn Səfərov, Naxçıvan Muxtar Respublikasının ekologiya və təbii sərvətlər naziri Xanlar Mustafayev, Bakı Dövlət Universitetinin İqtisadi və sosial coğrafiya kafedrasının müdiri, professor Çingiz İsmayılov və COP29 Azərbaycan Əməliyyat Şirkətinin İşçi qüvvəsi departamentinin kommunikasiyalar və təlimlər sektorunun rəhbəri, siyasi elmlər üzrə fəlsəfə doktoru Tural Hümbətov məruzəçi qismində çıxış ediblər.

İlk olaraq Ümummilli Lider Heydər Əliyevin və Azərbaycan Respublikasının suverenliyi, ərazi bütövlüyü və müstəqilliyi uğrunda canlarından keçən şəhidlərimizin əziz xatirəsi bir dəqiqəlik sükutla yad edilib, ardınca COP29 ilə əlaqədar videoçarx nümayiş olunub.
Konfransı giriş sözü ilə açan Ordubad Rayon İcra Hakimiyyətinin başçısı Rəcəb Rəhimli əvvəlcə Qubadlı Şəhəri Günü münasibətilə konfrans iştirakçılarını təbrik edib. Rayon İcra Hakimiyyətinin başçısı ölkə Prezidenti cənab İlham Əliyevin Sərəncamı ilə 2024-cü ilin ölkəmizdə “Yaşıl dünya naminə həmrəylik ili” elan olduğunu qeyd edib. Həmçinin noyabr ayında keçiriləcək COP29 sessiyasının əhəmiyyətindən bəhs edərək beynəlxalq tədbirlərə ev sahibliyi etmək sahəsində Azərbaycanın zəngin təcrübəyə malik olduğunu vurğulayıb. “Azərbaycan 2030: Sosial-iqtisadi inkişafa dair milli prioritetlər” haqqında dövlət başçısının Sərəncamına toxunan Rəcəb Rəhimli, Sərəncamda əks olunan beş milli prioritetdən birinin təmiz ətraf mühit və yaşıl artım ölkəsi kimi müəyyənləşdiyini diqqətə çatdırıb. 

Prioritetlərə uyğun olaraq ölkəmizdə ətraf mühitin sağlamlaşdırılması, yaşıllıqların bərpası və artırılması, su ehtiyatlarından və dayanıqlı enerji mənbələrindən səmərəli istifadənin təmin edilməsi istiqamətində önəmli işlərin görüldüyü xatırladılıb. Çıxışda, həmçinin yaşıl innovasiyaların inkişafının yalnız texnologiya və dövlət siyasəti ilə məhdudlaşmadığı, məhsuldar əməkdaşlıq üçün özəl sektor və vətəndaş cəmiyyətinin  birgə rolunun əhəmiyyəti qeyd edilib. "Yaşıl enerji" növlərinin yaradılmasının və bu enerjinin dünya bazarlarına nəqlinin dövlətin enerji siyasətinin mühüm tərkib hissəsi olduğu bildirilib
Naxçıvan Muxtar Respublikasının ədliyyə naziri vəzifələrini müvəqqəti icra edən, nazir müavini  Hüseyn Səfərov “İqlim Dəyişikliklərinə hüquqi cavab” adlı məruzəsində iqlim dəyişikliklərinin dünyanı narahat edən məsələ olduğunu, dünya ölkələrinin atmosferin zərərli qazlardan azaldılması istiqamətində müxtəlif hüququ öhdəliklər götürdüyünü diqqətə çatdırıb. "Yaşıl enerji"yə keçid sahəsində üzv dövlətlərin imzaladıqları beynəlxalq müqavilələrə riayət etməsinin zəruriliyini qeyd edib.
Naxçıvan Muxtar Respublikasının ekologiya və təbii sərvətlər naziri Xanlar Mustafayev öz çıxışında iqlim dəyişikliyinə təsir edən amilər və COP29-un hədəflərindən bəhs edib. 2024-cü ilin ölkəmizdə “Yaşıl dünya naminə həmrəylik ili” olduğunu vurğulayaraq “2023-2027-ci illər Naxçıvan Muxtar Respublikasının inkişafına dair Dövlət Proqramı”nda bu sahədə prioritet istiqamətlərin müəyyənləşdiyini diqqətə çatdırıb. Çıxışda muxtar respublikada bu il 550 hektar sahədə meşəsalma və meşəbərpa işlərinin aparılmasının nəzərdə tutulduğu, artıq 432 hektar sahədə işlərin yekunlaşdığı qeyd edilib.
Bakı Dövlət Universitetinin İqtisadi və sosial coğrafiya kafedrasının müdiri, professor Çingiz İsmayılov  iqlim dəyişməsində təbii proseslərin gedişinin izahına dair müxtəlif elmi əsaslandırmaları diqqətə çatdıraraq təbii proseslərin kainatda iqlim dəyişikliyinə təsir edən əsas səbəblərdən olduğunu vurğulayıb. Bu sahədə insan təsiri amillərinin rolunun azaldılmasının zəruriliyini nəzərə çatdıran Çingiz İsmayılov "yaşıl iqtisadiyyat" və "yaşıl enerji"nin təsir amillərinin nəzərə alınmasının vacibliyini konfrans iştirakçıları ilə bölüşüb.
COP29 Azərbaycan Əməliyyat Şirkətinin İşçi qüvvəsi departamentinin kommunikasiyalar və təlimlər sektorunun rəhbəri, siyasi elmlər üzrə fəlsəfə doktoru Tural Hümbətov “Beynəlxalq tədbirlərin gənclərin inkişafına töhfəsi” adlı məruzəsində son illərdə həyata keçirilən tədbirlərdə könüllülük hərəkatının əhəmiyyətindən bəhs edərək minlərlə gəncin bu hərəkatda rolunu nəzərə çatdıraraq könüllülük prinsipləri üzərində Azərbaycanda formalaşan hərəkatın digər ölkələrə nümunə olduğunu qeyd edib. O, son 10 il ərzində ölkəmizdə keçirilən beynəlxalq tədbirlərdə 100 mindən çox gəncin könüllü iştirakçı qismində öz bilik və bacarıqlarını təkmilləşdirdiklərini, beynəlxalq səviyyəli tədbirlərdə komanda rəhbərləri kimi formalaşdıqlarını bildirib.
 Yekunda rayon İcra Hakimiyyəti adından məruzəçilərə və konfrans iştirakçılarına  minnətdarlıq ifadə olunub.