NAXÇIVAN :

04 Aprel 2025, Cümə

Fərqlilikləri gözəllik olanların günü – 21 mart

...

Dünya var olandan hər kəs sağlam yaşamaq üçün bacardığını edir. Təəssüf ki, insan övladının özündən asılı olmayaraq, bu arzunun reallığa çevrilməsi mümkün deyil. Bəzi irsi və ya sonradan qazanılan xəstəliklərin daşıyıcıları bu qəbildən olan insanlardır. Və onların həyata baxışları da fərqlidir. Onlar dünyanı saf və bir o qədər də gözəl görürlər, hər şeyə rəğmən, üzlərindəki təbəssüm bu dünyanı daha da gözəlləşdirir. Belə insanlar məhz daun sindromlu insanlardır ki, bəzən onların bir gülümsəməsi bütün qayğıları unutduracaq qədər səmimi olur. Daun sindromlu insanlar saf, sevgi dolu, həyat eşqi ilə yaşayan və yalan nədir bilməyənlərdir: Onlar dünyaya fərqli baxdıqları kimi, özləri də fərqli görünüşə malikdirlər. Belə ki, ən çox gözə çarpan əlamətlər göz yarıqlarının monqoloid tipli, boyun və ənsə hissələrinin qalın, əllərinin geniş, barmaqlarının isə qısa və kök olmasıdır ki, bunlar ümumi görünüş fərqləridir. Lakin onları fərqləndirən əsas amil saf və təmiz ürəkləridir. Daun sindromlular da cəmiyyətdən, bizdən biridirlər. Belə insanlara, onların həyat tərzinə və hüquqlarına diqqət çəkmək üçün 2007-ci ildən bu yana hər il 21 mart “Dünya Daun Sindromu Günü” kimi qeyd olunur.

Daun sindromu bir xəstəlik deyil, genetik bir fərqlilikdir. Cəmiyyətdə bəzən onlara məhdudiyyətli fərdlər kimi baxılsa da, əslində, elə deyil. Çünki cəmiyyətin hər bir fərdi kimi, onların da hüquqları var. Onlar da təhsil alır, öyrənir, inkişaf edir, idmanda, incəsənətdə və iş həyatında uğurlar qazanırlar. Onların yeganə ehtiyacı anlayış, sevgi və bərabər imkanlardır. 21 mart tarixinin “Dünya Daun Sindromu Günü” kimi qeyd olunması fərqliliyin gözəlliyini vurğulamaq, daun sindromlu fərdlərin də digər insanlar kimi hüquqlara malik olduğunu xatırlatmaq üçündür. Onlar da cəmiyyətin hər bir fərdi kimi öz həyatlarını müstəqil şəkildə yaşamaq istəyirlər. Lakin onların bu arzularının reallaşması üçün cəmiyyətin dəstəyinə, qayğısına və anlayışına ehtiyacları var.

Ona görə də cəmiyyət olaraq daun sindromlu insanlara kömək göstərmək üçün atacağımız addımlar böyük dəyişikliklərə səbəb ola bilər. Onları məhdudiyyətlər içində görmək əvəzinə, elə insanların bacarıqlarını, potensiallarını görməyə çalışmalıyıq. Maarifləndirmə işləri apararaq insanlara daun sindromu haqqında doğru məlumatlar çatdırmalı, yanlış düşüncələri aradan qaldırmalıyıq. Ən əsası, onlara sevgi ilə yanaşmalıyıq, çünki bəzən sadə bir gülümsəmə belə onlara sevinc bəxş edə bilər. Onları olduğu kimi qəbul etsək, inklüziv və gözəl bir cəmiyyət qura bilərik. Məhz bu baxımdan ölkəmizdə də belə insanlara lazımi diqqət və qayğı göstərilir. Onların inkişaflarına dəstək vermək məqsədilə dərnəklər, cəmiyyətlər yaradılıb. Hətta daunlu uşaqlar üçün xüsusi məktəb va bağçalar təsis edilib ki, bu tədbir, öz növbəsində, onların sosiallaşması və cəmiyyətə qazanılması yönündə mühüm addımdır.

Unutmayaq ki, daunlu insanlar cəmiyyətimizin bir parçasıdır və  onların fərqlilikləri zəiflik deyil, əksinə gözəllikdir. 21 mart da məhz bu gözəlliyin dünya miqyasında qeyd edildiyi gündür.

Cavanşir BAĞIRLI

Nəşr edilib : 21.03.2025 11:24