NAXÇIVAN :

20 Noyabr 2026, Cümə

Fərid Şəfiyev: İraqda yaşayan türkmanları soydaşlarımız hesab etmək üçün tarixi və etnik əsaslarımız var

...

Azərbaycan və İraq türkmanları arasında münasibətlərin inkişafı ortaq tarixi köklərə, dilə, mədəniyyətə və etnik bağlılığa əsaslanır. Müasir dövrdə etnik kimlik və özünüidentifikasiya anlayışları müəyyən dəyişikliklərə məruz qalsa da, Azərbaycan xalqının formalaşma prosesi və milli kimliyinin inkişafı bu əlaqələrin mahiyyətini daha aydın göstərir. XX və XXI əsrlərdə azərbaycanlı kimliyi əsasında inkişaf edən milli düşüncəmiz İraqda yaşayan türkmanlarla ortaq mənsubiyyətimizi də xüsusi şəkildə dəyərləndirməyə imkan verir.

Bu fikirləri Beynəlxalq Münasibətlərin Təhlili və Multikulturalizm Mərkəzinin İdarə Heyətinin sədri Fərid Şəfiyev noyabrın 19-da “Azərbaycan və İraq türkmanları arasında ictimai münasibətlər: reallıqlar və perspektivlər” mövzusunda keçirilən konfransda çıxışı zamanı səsləndirib.

O bildirib ki, müasir dövrdə etnik adlandırmalar və milli özünüidentifikasiya formaları müəyyən mənada dəyişib. Azərbaycan xalqı XX əsrdə və XXI əsrdə özünü azərbaycanlı kimliyi əsasında ifadə edərək inkişaf edib. Bu baxımdan, İraqda yaşayan türkmanlarla münasibətlərə yalnız mədəni və tarixi yaxınlıq çərçivəsində deyil, həm də ortaq etnik mənsubiyyət kontekstində yanaşmaq mümkündür.

“Biz bu gün özümüzü azərbaycanlı hesab edirik və milli kimliyimiz də bu əsasda formalaşıb. Ona görə də İraqda yaşayan türkmanları tam hüquqla soydaşlarımız adlandıra bilərik. Mən xüsusilə bunu vurğulamaq istəyirəm ki, İraqda yaşayan həmin etnik qrup bizim soydaşlarımızdır. Bu bağlılığın tarixi, dil və mədəni əsasları var”, – deyə Fərid Şəfiyev qeyd edib.

Nəşr edilib : 19.11.2026 11:38