Epoksid nədir və bu sənət haqqında nələr bilirik?

Elm və texnikanın inkişafı cəmiyyətin inkişafına müsbət təsir etdiyi kimi, insanların yaşayışına, yaradıcılığına da təsirsiz ötüşməmişdir. Artıq mağazalarda, onlayn şəbəkələrdə hər növ materialdan hazırlanmış, növbənöv, zövqoxşayan hədiyyəliklər, əşyalar tapmaq mümkündür. İnsanlar bu əşyaları kiməsə hədiyyə etmək üçün alır və ya özü, yaxud yaşayış yeri üçün əldə edir, digər bir qisim isə bu əşyaları hazırlayır, yaxud satışı ilə məşğul olur. Müasir dövrdə trendə çevrilən və ən çox tələb olunan hədiyyəliklər məhz epoksid qatranından hazırlanmış məhsullardır.

Əldə etdiyimiz məlumata əsasən epoksidin tarixi 1909-cu ilə dayanır və rus kimyagərlər tərəfindən tapılıb. Ölkəmizdə isə son bir neçə ildə bu sahə tanınır. Muxtar respublikamızda bu işlə barmaqla sayılacaq qədər az insan məşğul olsa da, epoksiddən hazırlanmış əl işləri böyük rəğbət görür. Epoksiddən hazırlamış məhsulların içərisində dekorasiya məqsədilə istifadə olunan saç, çiçək, gül qırıntıları və sair olduğu kimi qaldığından bu əşyalar daha çox sevilir. Bu sənət sahəsinin gözəl nümunələrini yaradan İsmayıl Salahlı ilə epoksid haqqında bilmədiklərimiz barədə maraqlandıq.

2022-ci ildən bu işlə məşğul olan müsahibim deyir: – “Uzun zamandır ki, bu işə marağım vardı. Sənətin incəlikləri haqqında sosial şəbəkələrdən araşdırma apardıqdan sonra artıq 2022-ci ilin əvvəlindən özümü bu sahədə sınamağa qərar verdim. İlk zamanlar çox çətinliklərim olurdu. Çünki epoksiddən məhsul hazırlamaq üçün, ilk növbədə, onun məhlulunun qatılmasında qram balansını düzgün müəyyənləşdirmək lazım gəlir. Hətta belə çətinliklərinə görə, yeni başladığım zamanlarda bu sənətdən əl çəkmək istədim. Lakin səbrim və bu sahəyə olan marağım, sevgim sayəsində artıq bir neçə ildir ki, epoksid sənəti ilə məşğul oluram”.

Epoksidin nə olduğunu oxucularımız üçün aydınlaşdıran müsahibim bildirir ki, epoksid 2 məhlulun birləşməsindən hazırlanan şəffaf mayedir. Maye qarışdırıldıqdan sonra istədiyin rəngə uyğun piqment qarışdırılır və hazır olmuş məhlul qəliblərə tökülür. Məhlulun quruyub qəliblərdən çıxarılması üçün, təxminən, 18-24 saat vaxt lazımdır”.

Epoksiddən hər hansı əl işi hazırlamaq üçün istənilən zövqə uyğun rəng piqmentlərindən istifadə olunur. Daha çox şəkilli dominolar, saç tellərindən təsbehlər, klonlar, içi güllərlə bəzədilmiş hərf açarlıqlar, kül qabları və sair hədiyyəliklərə xüsusi maraq olduğunu qeyd edən müsahibim sifariş əsasında sosial şəbəkədə satışla məşğul olduğunu söyləyir.

Digər müsahibim Vüqar Əliyev bir ildir ki, bu işlə məşğul olur. İlk əvvəl hobbi kimi məşğul olduğu sənət sahəsindən sonralar qazanc da əldə etdiyini bildirən müsahibim qeyd edir ki, bu sahə yeni olduğu üçün muxtar respublikamızda, ümumiyyətlə, epoksidin nə olduğunu bilən insan sayı azdır. Bununla belə bu işə maraq göstərən müəyyən müştəri kütləsi də mövcuddur. Payız fəslini yaşadığımız bu günlərdə temperatura bağlı olaraq epoksidin quruma sürətinin ləng getdiyini söyləyən Vüqar Əliyev bildirir ki, məhz bu səbəbdən hazırlanmış təbəqədə müəyyən qüsurlar əmələ gəlir ki, bunu düzəltmək üçün zaman lazımdır. Bu işi görərkən mütləq şəkildə əlcək və maskadan istifadə olunmalıdır. Epoksid ilə yanaşı, müəyyən boyalardan, daşlardan da yararlanırıq. Elə əl işlərimiz var ki, orada sırf qəlibdən istifadə edirik. Lakin saat, masa kimi əşyalar hazırlayarkən isə panel taxta üzərində işləyirik.

Epoksiddən balaca hədiyyəliklərlə yanaşı, hər zövqə xitab edən şahmat, saat, masa və sair kimi əşyalar hazırlayan müsahibim sözlərinə davam edir: – “Bu sənətdə yeni olduğum üçün düşünürəm ki, öz üzərimdə daha çox çalışmalı və yeniliklər öyrənməliyəm. Gələcəkdə əl işlərimlə sərgilərdə çıxış etmək arzularımdan biridir. Bir də onu xüsusi vurğulamaq istərdim ki, kənardan nə qədər asan görünsə də, bu sənət çoxlu səbir, zəhmət və diqqət tələb edir”.

Sonda müsahibim təşəkkürünü ifadə edərək deyir: – “Bizim kimi əl işləri ilə məşğul olan insanların sənəti ilə maraqlandığınız, sənətimizin incəliklərini geniş oxucu kütləsinə çatdırdığınız üçün sizə minnətdaram”.

Türkanə ƏSƏDOVA