NAXÇIVAN :

22 Noyabr 2024, Cümə

Dövlət Proqramı uğurla icra edilir

...

Naxçıvan Muxtar Respublikası Nazirlər Kabinetinin mətbuat xidmətindən "Şərq qapısı"na verilən məlumata görə, “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı" çərçivəsində Naxçıvan Muxtar Respublikası Ekologiya və Təbii Sərvətlər Nazirliyi tərəfindən həyata keçirilən tədbirlər ardıcıl olaraq davam etdirilir.

Bu istiqamətdə həyata keçirilən tədbirlərin davamı olaraq nazirliyin Geologiya və Mineral Xammal Ehtiyatlarından İstifadə Agentliyi tərəfindən 2023-cü ilin dekabr ayından Naxçıvan iqtisadi rayonu ərazisində qara, əlvan və nəcib metalların axtarışı və qiymətləndirilməsi işlərinə başlanılıb.

Ağdərə-Nəsirvaz filizləşmə sahəsində 251 paqonmetr dərinliyində axtarış-kəşfiyyat quyusu qazılıb və 38 ədəd kern nümunəsi götürülüb. Götürülən nümunələr üzərində laborator analizlər aparılaraq müsbət nəticələr əldə edilib.  Belə ki, qurğuşunun (Pb) miqdarı sınaqların 19-da 1,023-2,546 %, 6-da isə 0,5-0,935 % təşkil edib.

Adıçəkilən filizləşmə sahəsində layihə dərinliyi 250 paqonmetr olan 249 paqonmetr dərinliyində ikinci axtarış-kəşfiyyat quyusu da qazılıb. 2024-cü ilin sentyabr ayının sonlarında başa çatan buruq-qazma işləri zamanı kern nümunələri götürülüb və analizlər aparılması üçün laboratoriyaya göndərilib.

Məlumat üçün bildirək ki, əlvan və nəcib metalların axtarışı və qiymətləndirilməsi məqsədilə indiyədək 1392 m3 həcmində xəndək qazılıb.

Qeyd edək ki, layihə üzrə 3-cü axtarış-kəşfiyyat quyusunun qazılacağı yer müəyyənləşdirilib, qazma aqreqatının servis-təmir işlərinə, quyu meydançasına yanaşma yolunun çəkilməsinə və digər kameral işlərə başlanılıb.

 
Nəşr edilib : 30.09.2024 12:44