NAXÇIVAN :

21 Dekabr 2024, Şənbə

Ali Məclisin İqtisadi siyasət komitəsinin iclası keçirilib

...

Dekabrın 20-də Naxçıvan Muxtar Respublikası Ali Məclisinin İqtisadi siyasət komitəsinin iclası keçirilib.

Komitənin sədri Emin Şıxəliyev iclasın gündəliyinə “Naxçıvan Muxtar Respublikasının 2025-ci il büdcəsi haqqında” Naxçıvan Muxtar Respublikası Qanununun (ikinci oxunuş) müzakirəsinin daxil edildiyini bildirib.

Emin Şıxəliyev qeyd edib ki, “Elektrik enerjisi və su təchizatı sahələrində idarəetmənin təkmilləşdirilməsi və bununla əlaqədar bəzi məsələlərin tənzimlənməsi haqqında” Azərbaycan Respublikası Prezidentinin 23 noyabr 2024-cü il tarixli Fərmanına uyğun olaraq Naxçıvan Muxtar Respublikası ərazisində fəaliyyət göstərən Dövlət Energetika Xidmətinin və Su Ehtiyatları Agentliyinin səlahiyyətlərinin müvafiq olaraq “Azərenerji”, “Azərişıq” Açıq Səhmdar Cəmiyyətlərinə və Azərbaycan Respublikası Dövlət Su Ehtiyatları Agentliyinə ötürülməsi nəticəsində Azərbaycan Respublikasının 2025-ci il üzrə dövlət büdcəsində Naxçıvan Muxtar Respublikasına ayrılmış dotasiyanın məbləğində dürüstləşmə aparılaraq 34 milyon 816 min manat azalma olub. Dəyişikliyə uyğun olaraq Naxçıvan Muxtar Respublikasının 2025-ci il büdcəsinin gəlirlərinin 493 milyon 143 min manat, xərclərinin 505 milyon 184 min manat məbləğində təsdiq edilməsi nəzərdə tutulub. Buna müvafiq olaraq “Naxçıvan Muxtar Respublikasının 2025-ci il büdcəsi haqqında” Naxçıvan Muxtar Respublikasının Qanun layihəsi yenidən işlənib.

Naxçıvan Muxtar Respublikasının maliyyə naziri Həsən İsmayılov qanun layihəsi barədə məlumat verib və gündəlikdə duran məsələ ətrafında müzakirələr aparılıb.

Sonda müzakirə olunan məsələ ilə əlaqədar İqtisadi siyasət komitəsinin rəyi oxunub, yenidən hazırlanmış qanun layihəsi yeddinci çağırış Naxçıvan Muxtar Respublikası Ali Məclisinin növbəti iclasının (ikinci oxunuş) müzakirəsinə tövsiyə olunub.

Naxçıvan Muxtar Respublikası

Ali Məclisinin mətbuat xidməti

Nəşr edilib : 20.12.2024 17:24