NAXÇIVAN :

23 Noyabr 2024, Şənbə

AİBNDX nümayəndələri Naxçıvanda seminar keçiblər

...

Azərbaycan İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin nümayəndələri Naxçıvan Muxtar Respublikası İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin əməkdaşları üçün təcrübə mübadiləsi məqsədilə seminarlar keçiriblər.
Naxçıvan Muxtar Respublikası İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin mətbuat xidmətindən “Şərq qapısı”na bildirilib ki, maarifləndirici tədbirin ilk günündə istehlakçı hüquqlarının müdafiə vasitələri, sözügedən sahədə mövcud qanunvericilik aktlarından irəli gələn məsələlər və digər əhəmiyyətli mövzuları əhatə edən təqdimatlar olunub. Həmçinin Dövlət Xidməti tərəfindən istehlakçı hüquqlarının müdafiəsi və istehlak bazarına nəzarət sahələrində pozuntu hallarının preventiv şəkildə qarşısının alınması istiqamətində görülən işlər diqqətə çatdırılıb. İstehlak bazarında istehlakçı məmnunluğuna nail olunması üçün dövlət-özəl tərəfdaşlığının vacibliyi vurğulanıb, istehlakçıların hüquqlarının təmin edilməsində sahibkarların rolunun artırılmasının əhəmiyyətindən bəhs edilib.
Rəqabət Məcəlləsinin tətbiqinə həsr olunmuş növbəti seminarda muxtar respublikanın aidiyyəti qurum əməkdaşları ilə yanaşı, təbii inhisar subyektlərinin nümayəndələri və sahibkarlar da iştirak ediblər. Tədbir çərçivəsində rəqabəti məhdudlaşdıran sazişlər, iqtisadi təmərküzləşmələr, haqsız rəqabət və hökmran mövqedən sui-istifadə hallarının aradan qaldırılmasına dair məcəllədə yer alan tənzimləmə mexanizmləri diqqətə çatdırılıb. 
Sonda tədbir iştirakçıları ilə məcəllənin effektiv tətbiqi üsulları istiqamətində qarşılıqlı müzakirələr baş tutub.
Nəşr edilib : 02.10.2024 10:51