NAXÇIVAN :

04 May 2026, Bazar ertəsi

NDU-da Psixoloji xidmət və uşaq inkişaf mərkəzinin açılışı olub

...

15 oktyabr 2025-ci il tarixdə Naxçıvan Dövlət Universitetində Psixoloji xidmət və uşaq inkişaf mərkəzinin açılışı olub.
Universitetin rektoru Elbrus İsayev çıxış edərək qeyd edib ki, Psixoloji xidmət və uşaq inkişaf mərkəzinin açılışı yüksəkixtisaslı psixoloq kadrların hazırlanması üçün olduqca önəmlidir. Çünki universitetdə  2021-ci ildən bakalavriat səviyyəsində Psixologiya ixtisası, magistratura səviyyəsində isə 2025-2026-cı tədris ilindən  İnkişaf psixologiyası ixtisaslaşması üzrə kadr hazırlığı aparılır. Rektor ali təhsil ocağında bütün istiqamətlərdə olduğu kimi, Psixologiya ixtisasının da xüsusilə diqqətdə olduğunu, bu istiqamətdə yeniliklərin izlənildiyini vurğulayıb. Bildirilib ki, bu gün açılışı keçirilən mərkəz də zəngin maddi-texniki baza ilə təchiz olunub və tələbələr bu imkanlardan yararlanaraq həm tədris prosesində, həm də dərsdənkənar məşğələlərdə müxtəlif simuliyasiyalar təşkil etməklə praktiki bacarıqlar əldə edə bilərlər. Elbrus İsayev, həmçinin akademik bilgilərin də zənginləşməsi üçün keçirilən tədbirlərdən söz açıb, xüsusilə ilk dəfə Naxçıvan Dövlət Universitetində keçirilən Azərbaycan Psixoloqlarının I Forumunu diqqətə çatdırıb. Vurğulanıb ki, həm təşkilatı tədbirlər, həm də bu gün açılışı olan mərkəz deməyə əsas verir ki, bu istiqamətdə əldə olunan nəticələr NDU-da  Psixologiya ixtisasında tədrisin keyfiyyətini daha da yüksəltməklə yanaşı, ümumilikdə, ölkədə bu sahənin inkişafına dəstək olacaq.
Magistratura və doktorantura mərkəzinin direktoru, psixologiya üzrə fəlsəfə doktoru Çapay Quliyev mərkəzin yaradılması məqsədi və fəaliyyət istiqamətləri haqqında məlumatları diqqətə çatdırıb. Qeyd olunub ki, psixoloji xidmət və tədris məqsədli qurulan mərkəzdə iki istiqamətdə xidmət aparılması planlaşdırılır. Mərkəz daxilindəki “Psixoloji konsultasiya” otağında psixoloji dəstəyə ehtiyacı olan universitet kollektivinə psixoloji xidmət göstəriləcək. Uşaq inkişaf mərkəzində isə Psixologiya ixtisasında təhsil alan tələbələrin tədrisin praktiki əsaslarla aparılmasını təmin etmək imkanı olacaq.
Naxçıvan Dövlət Universitetinin psixoloqu Nuranə Səlimova isə Uşaq inkişaf mərkəzinin fəaliyyəti, mərkəzdə mövcud olan avadanlıqlar haqqında məlumat verib. Qeyd olunub ki, burada diqqət əskikliyi olan və hiperaktiv uşaqlara yardım məqsədli “Play Attention” aparatı, müxtəlif fobiyaları və adaptasiya problemlərini aradan qaldırmaq məqsədilə “Virtual reallıq” aparatı, nitq problemi olan uşaqlara inkişafetdirici dəstək məqsədilə “Forbrain” aparatı və uşaqlarda sensor adaptasiya, müxtəlif psixoloji inkişaf ləngimələrini aradan qaldırmaq üçün müxtəlif vəsaitlər var.
Qeyd edək ki, tədbirdən sonra rektor Elbrus İsayevin Psixologiya ixtisasının tələbələri ilə görüşü olub, tələbələrin təklifləri dinlənilib və onları maraqlandıran suallar cavablandırılıb.

Nəşr edilib : 15.10.2025 15:48