Hər il Novruz gələndə xalqımız özünün ən əziz bayramını böyük təntənə ilə qeyd edir, insanlar bir-birinə cansağlığı, xoşbəxtlik, bahar qədər gözəl və təravətli həyat arzulayırlar. Bütün Türk dünyasının bu ümumi böyük bayramını Azərbaycan artıq beş ildir ki, xüsusi coşqu, işğaldan azad olunmuş torpaqlarımızda aparılan genişmiqyaslı quruculuq, doğma yurd-yuvasına qayıdan insanların sevinc ab-havası ilə qeyd edir. Prezident cənab İlham Əliyev hər dəfə böyük qürurla yandırdığı Novruz tonqalı ilə Qarabağa qayıdan hər bir yerli sakinin bundan sonra öz evində firavan yaşaması üçün ən ülvi xeyir-duasını verir, insanlara ən xoş diləklərini çatdırır. Bu, Azərbaycanın gələcəyi üçün bütün çətinliklərin öhdəsindən layiqincə gəlib, ölkəsinin  hər bir vətəndaşını xoşbəxt görmək istəyən dövlət başçısının ən gözəl arzularıdır. 

Bir insan ömrü üçün bu dünyanın gözəlliklərini doyunca yaşayıb, özü, ailəsi və mənsub olduğu xalqının dövləti üçün xidmətlər etmək, bu mənada, ən xoşbəxt hisslərdir. Təkcə özünün deyil, öz biliyi, zəhməti və əməlləri ilə digər insanların da həyatını yaxşıya doğru dəyişdirib onlara həqiqi xoşbəxtliyi yaşadan liderlərin cəmiyyət qarşısındakı xidmətləri isə bu gün bir çox ölkələrin xalqları üçün, sadəcə, arzuedilən olub, bəziləri üçün isə, ümumiyyətlə, üfüqdə də görünmür. Azərbaycan xalqının bu gün yaşadığı xoşbəxt həyatı hər zaman fəxrlə bölüşən dövlət başçımız cənab İlham Əliyevin ata vəsiyyətinə sədaqəti ilə həmişə qürur duyduğu belə gözəl hisslər isə onun bu dünyanın ən bəxtəvəri olduğunu deyir. Ulu Öndər Heydər Əliyevin memarı olduğu müstəqil Azərbaycan Respublikası tam suverenliyinə qovuşub, dünyanın aparıcı ölkələri sırasında yer alması, güclü iqtisadiyyatı və ordusu ilə heç kimsədən asılı olmadan yaşamaq arzusunu reallığa çevirmək bir oğul üçün xoşbəxt həyat, bir dövlət başçısı üçün isə məqsədinə çatmaq istədiyi ən gözəl hədəfdir. 
Müstəqil dövlətin vətəndaşı olmaq hər bir insan üçün böyük xoşbəxtlik, bu dövlətin başçısı üçün isə ikiqat xoşbəxtlikdir. Əvvəlcə çox çətin görünən, ancaq bu gün xalqının etimadı və dəstəyi ilə artıq reallıq olan tam suverenlik dövlət başçımızın yürütdüyü xarici siyasətdəki gücünü beşqat artıran, kimliyindən asılı olmayaraq, bütün dünya liderləri ilə təmaslarında güclü xarizmasını ortaya qoyan ən mühüm faktordur. Suverenlik ölkəmiz üçün elə bir nemətdir ki, onun gücü ilə Azərbaycan vətəndaşları dünyanın harasında olursa-olsun, öz pasportu ilə fəxr edir, əsgərlərimiz keşiyində dayandığı sərhədləri göz bəbəyi kimi qoruyur, dövlət başçımız isə ölkə­sini bütün beynəlxalq platformalarda, ikitərəfli görüşlərdə və rəsmi səfərlərdə tam qürurla təmsil edə bilir. Bir sözlə, bu gün tam suverenliyinə qovuşmuş Azərbaycan elə bir gücə çatıb ki, o, liderinin başçılığı altında öz milli maraqları çərçivəsində xarici siyasətini istənilən istiqamətdə qura bilir. Bu, hazırkı dünyada Azərbaycandan daha geniş əraziyə və iqtisadi gücə malik olan bir çox dövlətlər üçün uzaq olan bir xoşbəxtlikdir. 
Azərbaycan Cənubi Qafqazın aparıcı iqtisadi və hərbi gücünə sahibdir. Bu reallığı hər çıxışında ortaya qoyan dövlət başçımız ölkəmizin dostlarına, qonşularına və eləcə də dost olmayanlara bunları açıqca ifadə etməklə bu regionda söz sahibinin məhz Azərbaycan olduğunu vurğuladığı zaman yaşadığı dərin məmnuniyyət hər birimizdə qürur yaradır. Bir zamanlar erməni zülmündən qaçan Kəlbəcərdəki mülki insanları qurtarmaq üçün bir helikopteri belə olmayan Azərbaycan bu gün sahib olduğu maddi və maliyyə imkanları, mülki və hərbi sənaye infrastrukturu ilə təbii fəlakətlə üzləşən bir çox dost və qardaş ölkəyə cəmi bir günün içində yardıma gələrək burada yaşayan insanların köməyinə çatır. Bunu dünyaya nümayiş etdirən dövlət başçımız işğala məruz qalmış ölkəni cəmi 20 il ərzində qalib ölkəyə, yardım alan ölkəni isə yardım göndərən ölkəyə daşıya bilməyin xoşbəxtliyi içərisindədir. 
Prezident cənab İlham Əliyev çıxışlarında müasir dünyadakı düzənin pozulduğunu, bu düzənə məsul olan beş böyüklərin planetdəki ümumi sülhə vurduğu zərərləri açıqca göstərərək burada Türk dünyasına doğru istiqamətini seçməklə ölkəmizin gələcəkdə bir qlobal güc ünsürü olmaq yolunda geniş perspektivlər açmışdır. İşğaldan azad olunmuş Qarabağa, Şuşaya da səfərlər edib buradan dünyaya mesajlar verən qardaş türk dövlətləri ilə qurulmuş sıx əlaqələr, həmçinin dövlət başçımızı ölkəsinin hava məkanında qırıcı təyyarələrin müşayiəti ilə qarşılayan qardaş Pakistanla yaradılmış ittifaq Azərbaycanın mürəkkəb beynəlxalq siyasi konyunkturada əlini daha da gücləndirməklə bölgəmizin sülh qarantoru halına gətirmişdir. Bu mənada, dövlət başçımızın regi­onal və beynəlxalq siyasi arenadakı aktorlar arasında qazandığı şəxsi nüfuzu birbaşa olaraq ölkəmizin də qlobal arenadakı adını yüksəklərə daşıyaraq təkcə müsəlman və türk dövlətləri arasında deyil, həm də kiçik ada dövlətləri də daxil olmaqla bütün dünyada hörmətlə çəkilməsinə nail olmuşdur. Odur ki, bu gün işğala məruz qalıb çox ciddi iqtisadi, hərbi-siyasi problemlərlə üz-üzə qalmış ölkələrin politoloqları Azərbaycan Respublikasının Prezidenti cənab İlham Əliyevi, bu mənada da, ən xoşbəxt dövlət başçısı saymaqda olduqca haqlıdırlar. 
Azərbaycan Respublikası əhali sayı və mövcud iqtisadiyyatının həcmi ilə müqayisədə dünyanın ən güclü ordusuna malik ölkələr arasında yuxarı pillələrdə yer tutan, bununla da qazandığı qələbələrlə haqlı olaraq fəxr edən bir ölkədir. Dövlət başçımızın 44 günlük II Qarabağ müharibəsi dövründə və ondan sonrakı periodda trendə çevrilmiş “Dəmir yumruq yerindədir!” ifadəsi hələ də düşmənin canına qorxu salmaqla bərabər, ordu quruculuğunda zamanını boşa vermiş bir çox dövlətlərin də başçılarını dərindən düşündürməkdədir. Bu mənada, müzəffər Azərbaycan Ordusunun Ali Baş Komandanı cənab İlham Əliyev qəhrəman əsgərlərimizin hər Zəfər paradını, hər əsgər salamını aldıqca əziz şəhidlərimizin qanının yerdə qalmadığına bir daha şahid olur və bununla fəxr edirik. Bunu təkcə ölkəmizin vətəndaşlarına deyil, bütün dünyadakı azərbaycanlılara bəxş edən Prezidentimiz, bu mənada, bütün 50 milyonluq həmvətənlərimizin komandanıdır. 
Ölkəmizin sadə vətəndaşlarının da ən çox sevdiyi İlham Əliyevin dövlət başçısı kimi paytaxt Bakıda, səfər etdiyi regionlarda, xüsusən işğaldan azad olunmuş ərazilərə qayıdan keçmiş məcburi köçkünlərlə keçirdiyi görüşlər əsl bayrama, insanların yaddaşında uzun müddət ərzində yaşayan xoş xatirələrə çevrilir. Bayram günlərində, regionlara səfərində, əlamətdar tarixlərdə və müxtəlif açılış tədbirlərində vətəndaşlarla görüşlərində dövlət başçımız adamların ona olan məhəbbətini daha da artıran sadəliyi və səmimiyyəti, şəhid valideynlərinə, qazilərə, ağsaqqal və ağbirçəklərə göstərdiyi yüksək ehtiramı, balacalara olan sevgisi ilə hamının qəlbində yer tutmuşdur. Bu mənada, Prezidentlə olan xatirə fotolarını doğmaları ilə bölüşən yüz minlərlə Azərbaycan vətəndaşının paylaşdığı statuslara göndərilən milyonlarla ürəklər belə xoş anları yaşayan insanların sayından xəbər verir. 
Bu dünyanın ən böyük səadə­ti ailə xoşbəxtliyi, gözəl ailə başçısı olmaqdır. Ailə üzvləri ilə birgə tez-tez ictimaiyyət arasına qatılan dövlət başçımız ölkəmizin sosial, mədəni və humanitar sahələrində həyat yoldaşı və ən yaxın silahdaşı Mehriban xanım Əliyevanın yaxın dəstəyinə arxalanmaqla Azərbaycanın xoşbəxt gələcəyi üçün əzmlə çalışmaqdadır. Azərbaycan Respublikasının Birinci vitse-prezidenti və Heydər Əliyev Fondunun rəhbəri kimi mühüm ictimai-siyasi vəzifələr daşıyan Mehriban xanım Əliyeva övladlarının və nəvələrinin təhsilli və milli dəyərlər əsasında böyüməsinə xüsusi diqqət yetirməklə əsl azərbaycanlı xanımı nümunəsi göstərir. Bu gözəl ailənin başçısı Prezident cənab İlham Əliyev özünün bütün enerjisini, bilik və bacarıqlarını ölkəmizin daha da güclü olması yolunda sərf etməklə bütün Azərbaycanın da böyük bir ailə kimi vahid bir ideologiya – Azərbaycançılıq yolunda bütünləşməsinə xidmət edir. Bu, son 200 il ərzində xalqımızın ən böyük, ən ədalətli qələbəsini qazanmış Liderin ən məsuliyyətli vəzifəsi, ən xoşbəxt missiyasıdır. 

 Əli CABBAROV