NAXÇIVAN :

20 May 2026, Çərşənbə

WUF13 çərçivəsində Ədəbiyyat Muzeyində Diyarbəkirin tarixinə həsr olunmuş məruzə dinlənilib

...

Nizami Gəncəvi adına Milli Azərbaycan Ədəbiyyatı Muzeyində BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində maarifləndirici seminar məşğələsi keçirilib.
"Şərq qapısı" xəbər verir ki, tədbirdə muzeyin elmi işlər üzrə direktor müavini, filologiya üzrə fəlsəfə doktoru İlhamə Gültekin “Ağqoyunlular və Səfəvilər dövründə Diyarbəkir surlarının bərpası – kitabə və qabartmalar” mövzusunda məruzə ilə çıxış edib. O qeyd edib ki, Türkiyənin Diyarbəkir bölgəsinin tarixi məskunlaşma dövrü miladdan öncəki zamana aid edilsə də, şəhərin dəqiq tarixi hələ də müəyyənləşməyib. Daha sonra məruzəçi toponimika tarixinə nəzər salaraq müxtəlif əsrlərdə və hakimiyyətlər dövründə şəhərin necə adlandırılması haqqında məlumat verib, 1937-ci ildə Mustafa Kamal Atatürkün sərəncamı ilə bölgədəki mis mədənlərinə istinadən şəhərin "Diyarbakır" adını qazandığını vurğulayıb.
Bildirilib ki, şəhərin qədim divar və qüllələrində, şurlarında tapılan çoxsalyı kitabələr Bizans, İslam və İslamdan öncəki zamana aid olması ilə fərqlənir.
İlhamə Gültekin qeyd edib ki, XV-XVI əsrlərdə Ağqoyunlu, Səfəvi şahlarının hakimiyyəti altına keçən Diyarbəkirdə həmin dövrə aid xeyli kitabə də aşkar olunub.
Dövrünün önəmli tikililəri içərisində “Şeyx Matar məscidi” və “Dördayaqlı minarə”ni qeyd edən məruzəçi minarənin Hənəfi, Şafi, Maliki və Hənbəli məzhəblərini simvolizə etdiyini vurğulayıb. Qeyd edib ki, Səfəvilər dövrü memarlığının əsas xüsusiyyətlərini özündə daşıyan Diyarbəkirin Bismil adlanan rayonu məhz Ağqoyunlu və Səfəvi hakimiyyəti dövründə burada məskunlaşan türkman tayfaları tərəfindən salınıb.
Seminar məşğələsi muzey əməkdaşlarının sual və çıxışları ilə davam edib.

Nəşr edilib : 20.05.2026 18:16