NAXÇIVAN :

05 Aprel 2025, Şənbə

Ucalığın mübarək, Azərbaycan qadını...

...

Qadın ucalıq adının rəmzi, müqəddəsliyin simvoludur. O, Uca Yaradanın yaradılışlar arasında yaratdığı şah əsərdir, insanlığa ən böyük ərməğanı, qutsal əmanətidir... Qadın füsunkar gözəlliyin ülviyyət çələngi, əsrarəngizliyin özü, ecazkarlıq nümunəsidir! Tanrının Yaradandan sonra yer üzündə yaratmaq qüdrəti bəxş etdiyi müqəddəslik təzahürüdür. Gözəllik, zəriflik, nəciblik mücəssəməsidir! İllah da Azərbaycan qadını!
O, qadın müqəddəsliyinin ən ümdə xüsusiyyətləri ilə ucalıq məqamı kimi səciyyələnə bilər. Onun varlığı, həm də qeyrət, namus, vəfa, sədaqət paklığından yoğrulub. Mərdlik, mübarizlik, igidlik kimi ali məfkurədən güc alıb. Azərbaycan qadını gözəlliyi, zərifliyi, nəcibliyi qədər sərt, mərd, mübarizdir. Həssaslığı, kövrəkliyi kimi dözümü, səbri, mətanəti ilə örnəkdir.
O, bir əlində nənni yüyrüyü tutub, “Cəngi” sədasında igid övladlar böyüdüb, tərbiyə edib, bir əlində qılınc tutub, at belində, düşmən önündə igidliyi, qəhrəmanlığı ilə ər igidlərdən seçilməyib. O, cəsarəti, ər qeyrətiylə yağılara qan udduran Tomris anadır. Haqq uğruna vuruşlarda at çapıb, qılınc qurşanan şücaətli Nigar xanımdır, igidliyi dillərdə nəğməylə anılan Həcər xanımdır. İsməti naminə yad önündə oğul dağına razı olan Burla xatındır. Sevgi sınağında hünər göstərən Banuçiçəkdir.
Sevgisində vəfa, sədaqət örnəyi Fərizədir.
Qarabağ uğrunda döyüşlərdə igidlik göstərən, yurd, torpaq sevgisinin ən ümdə fövqdə durduğunu sübut edən Milli qəhrəmanlardır Azərbaycan qadını.
O, azğın erməni qəsbkarlarının gülləsinə tuş gələn, qeyrət, namus mücəssəməsi kimi qaya vüqarında simvollaşan igid xanımımız Gültəkin Əsgərovadır.
Vətənin dar günündə igidliyi, cəsarətiylə Azərbaycançılıq məfkurəsinin ülviliyini möhürləyən Salatın Əsgərovadır...
Möminə xatın əzəməti timsalında müdriklik səltənəti ünvanlıdır Azərbaycan qadını! O, Vətənə sevginin övlad məhəbbətindən ucada olduğunu təsdiqləyən şəhid anasıdır. Qürurla çiynini igid tabutuna verib onu son mənzilə uğurlayan vüqarlı şəhid qadınıdır. Pak məfkurə işığında ölümə “Xoş gəldin”, – deyən, “olum-ölüm” dilemmasında qalan sərnişinlərə “Hər şey yaxşı olacaq!” nidasıyla həyat eşqi aşılayan Milli Qəhrəman Hökumə Əliyevadır...
Azərbaycan qadını tarixən öz mənəviyyatı, ağlı, yüksək zəkası, müdrikliyi ilə varlığını sübut edib. Həyatın bütün sahələrində, o cümlədən elm, təhsil, siyasət, diplomatiya və digər istiqamətlərdə böyük uğurlara, möhtəşəm nailiyyətlərə imza atmış və atmaqdadırlar. Bu mənada, ölkəmizdə birinci xanım ucalığında, vətən, xalq naminə misilsiz xidmətlər göstərən Mehriban xanım Əliyevanın fəaliyyəti əsl örnək timsalıdı. Bu sırada Azərbaycan gerçəkliyinin dünyada tanınmasında mühüm işlər görən   Leyla xanım Əliyevanın adı da qeyd olunmalıdır.
Beləcə, ucalıq, əzəmət, möhtəşəmlik rəmzidir Azərbaycan qadını.
O, günü-gündən çiçəklənən, siyasi, iqtisadi gücü ilə qüdrətlənən, Qafqazda lider dövlət kimi dünya arenasında söz sahibi olan Azərbaycanımızın daha uca zirvələr fəth etməsində fəallıq nümayiş etdirir. Qanunverici, idarəedici dövlət orqanlarında yüksək vəzifələrdə təmsil olunur. Ölkə iqtisadiyyatının inkişafına, sosial, mədəni-mənəvi yüksəlişinə töhfələr verir...
Ən başlıcası isə o, hər zaman xalqımıza mənsub köklü tarixi ənənələrə, milli-mənəvi, əxlaqi dəyərlərə sədaqəti, vəfası, mətanəti ilə qadın ucalığının fövqündə durmaqdadır. Zərifliyi, nəcibliyi, humanistliyi ilə seçilməkdədir. Ucalığın mübarək Azərbaycan qadını!!!

Adilə SƏFƏROVA
Azərbaycan Respublikasının Əməkdar mədəniyyət işçisi 

Nəşr edilib : 08.03.2025 16:30