Bakı, 22 iyun 2026-cı il – Türk dünyasının iki qardaş dövləti olan Azərbaycan və Türkmənistan arasında siyasi, iqtisadi və humanitar sahələrdə əməkdaşlığın genişləndirilməsinə yönəlmiş mühüm addımlar münasibətlərin yeni və perspektivli mərhələyə qədəm qoyduğunu göstərir. Türkmənistan Prezidenti Sərdar Berdiməhəmmədovun Azərbaycana rəsmi səfəri iki qardaş ölkənin təkcə coğrafi yaxınlıqla deyil, həm də ortaq tarix, zəngin mədəni irs və mənəvi dəyərlərlə bir-birinə sıx bağlı olduğunu bir daha nümayiş etdirdi. Azərbaycan Prezidenti İlham Əliyevin səfər çərçivəsində mətbuata verdiyi bəyanat bu tərəfdaşlığın regional və beynəlxalq əhəmiyyətini vurğulamaqla yanaşı, gələcək əməkdaşlığın daha da inkişaf etdirilməsi üçün möhkəm zəmin yaratdı.

Azərbaycan Prezidenti İlham Əliyev çıxışında Türkmənistanın Qarabağın bərpası və yenidən qurulması prosesinə göstərdiyi dəstəyi xüsusi qeyd etdi. Türkmənistan Xalq Məsləhətinin Sədri Qurbanqulu Berdiməhəmmədovun təşəbbüsü ilə Füzuli şəhərində məscidin təməlinin qoyulması iki ölkə arasında mövcud olan səmimi dostluq, qardaşlıq və qarşılıqlı etimad münasibətlərinin parlaq təzahürüdür. Bu təşəbbüs işğaldan azad edilmiş ərazilərin bərpasına beynəlxalq dəstəyin əhəmiyyətini nümayiş etdirməklə yanaşı, Türkmənistan xalqının Azərbaycan xalqına göstərdiyi mənəvi yaxınlığın və həmrəyliyin də ifadəsidir. Füzulidə inşa olunan məscid yalnız dini-mədəni obyekt deyil, həm də Türk dünyasının birliyini, ortaq dəyərlərini və qardaş xalqların çətin günlərdə bir-birinə dayaq olmaq ənənəsini əks etdirən mühüm bir simvoldur.

Azərbaycan və Türkmənistan xalqları ortaq köklərə, oxşar mədəniyyətə, qədim tarixi əlaqələrə və zəngin ənənələrə malikdirlər. Bu möhkəm tarixi-mədəni təməl üzərində formalaşan münasibətlər mütəmadi olaraq təşkil edilən mədəni tədbirlər vasitəsilə daha da inkişaf etdirilir və dərinləşir. Azərbaycan Prezidenti İlham Əliyevin qeyd etdiyi kimi, bu il Aşqabad və Arkadağ şəhərlərində Azərbaycan Mədəniyyəti Günləri keçirilmiş, ötən il isə Türkmənistanın mədəniyyət xadimləri Bakı və Gəncə şəhərlərində qonaq olmuşlar. Bu cür mədəni mübadilələr xalqlar arasında qarşılıqlı anlaşmanı gücləndirməklə yanaşı, ortaq mədəni irsin qorunmasına və gələcək nəsillərə ötürülməsinə mühüm töhfə verir. Bakı və Aşqabadın, eləcə də Arkadağ və Füzuli şəhərlərinin qardaşlaşmış şəhərlər elan edilməsi bu mədəni əməkdaşlığın rəsmi təsdiqi kimi çıxış edir. Bu təşəbbüslər Türk dünyasının zəngin mədəni irsinin təbliğinə xidmət etməklə yanaşı, gənc nəsillər arasında qardaşlıq və dostluq hisslərinin möhkəmləndirilməsinə şərait yaradır.

Mərkəzi Asiya ilə inteqrasiya regional əməkdaşlığın və davamlı inkişafın əsas istiqamətlərindən biri kimi çıxış edir. Yeni geosiyasi reallıqlar fonunda Azərbaycanın Mərkəzi Asiya Dövlət Başçılarının Məşvərət Şurasına tamhüquqlu üzv qəbul edilməsi Prezident İlham Əliyev tərəfindən tarixi hadisə kimi qiymətləndirilmişdir. Türkmənistanın bu prosesdə göstərdiyi fəal dəstək isə regional inteqrasiyanın güclənməsində mühüm rol oynayır. Coğrafi baxımdan Cənubi Qafqazda yerləşməsinə baxmayaraq, Azərbaycanın mədəni-tarixi əlaqələri, eləcə də regional qarşılıqlı əlaqələr və nəqliyyat-logistika sahəsində həyata keçirdiyi təşəbbüslər ölkəni geniş mənada Mərkəzi Asiya məkanının vahid geosiyasi və geoiqtisadi sisteminə inteqrasiya edən mühüm aktora çevirir. Bu üzvlük türk dövlətləri arasında siyasi və iqtisadi əlaqələrin daha da dərinləşməsinə, həmçinin regional təhlükəsizlik və sabitliyin möhkəmləndirilməsinə xidmət edir.

Qlobal əhəmiyyətli tərəfdaşlıq və nəqliyyat dəhlizlərinin inkişafı Azərbaycan və Türkmənistan arasında strateji əməkdaşlığın dərinləşməsinə, regional inteqrasiyanın güclənməsinə və beynəlxalq tranzit imkanlarının genişlənməsinə mühüm şərait yaradır. Azərbaycan Prezidenti İlham Əliyev çıxışlarında nəqliyyat-logistika sahəsində əməkdaşlığın strateji əhəmiyyətini xüsusi vurğulamışdır. Azərbaycan və Türkmənistan arasında bu sahədə formalaşan əməkdaşlıq uzunmüddətli xarakter daşıyır və yalnız iki ölkə üçün deyil, həm də daha geniş coğrafiya üçün strateji əhəmiyyət kəsb edir. Müasir dövrdə etibarlı və təhlükəsiz nəqliyyat marşrutlarının məhdud olduğu şəraitdə, hər iki ölkənin birgə səyləri ilə yük axınlarının artırılması və üçüncü ölkələrdən tranzit yüklərin cəlb edilməsi regional iqtisadi inkişafa mühüm töhfə verir. Bu əməkdaşlıq qarşılıqlı etimadın və koordinasiyalı fəaliyyətin nəticəsi olaraq formalaşmışdır və gələcəkdə də ikitərəfli və çoxtərəfli əlaqələrin prioritet istiqamətlərindən biri kimi qalacaqdır. Xəzər dənizi üzərindən keçən nəqliyyat dəhlizləri isə Şərq-Qərb ticarət əlaqələrində yeni və strateji imkanlar açır.

Türkmənistan və Azərbaycan arasında mövcud olan dostluq, qardaşlıq və strateji tərəfdaşlıq münasibətləri gələcəyə yönəlik baxış çərçivəsində yeni əməkdaşlıq imkanlarının formalaşması və qarşılıqlı inkişaf perspektivlərinin genişlənməsi üçün möhkəm zəmin yaradır. Azərbaycan Prezidenti İlham Əliyevin və Türkmənistan Prezidenti Sərdar Berdiməhəmmədovun verdiyi bəyanatlar iki ölkə arasındakı münasibətlərin strateji dərinliyini və türk dövlətləri birliyinin regional və beynəlxalq əhəmiyyətini bir daha nümayiş etdirmişdir. Qarabağın bərpasına göstərilən dəstək, zəngin mədəni əlaqələr, Mərkəzi Asiya ilə inteqrasiya, nəqliyyat-logistika sahəsində əməkdaşlıq və Türkmənistanın inkişafına qarşılıqlı dəstək bu qardaşlığın əsas dayaqlarını təşkil edir. Bu münasibətlər təkcə iki ölkənin deyil, bütövlükd, Türk dünyasının inkişafına və rifahına xidmət etməklə yanaşı, regional sabitliyin və sülhün möhkəmləndirilməsində mühüm rol oynayır. Gələcəkdə bu əməkdaşlığın daha da genişlənəcəyi və yeni uğurlarla nəticələnəcəyi şübhəsizdir. Çünki bu strateji birlik ortaq tarixi dəyərlər və qarşılıqlı maraqlar üzərində formalaşmışdır.

Gülxarə ƏHMƏDOVA 

 Naxçıvan Muxtar Respublikası Ali Məclisinin deputatı